وفاقی ہائیر ایجوکیشن کمیشن کے چیئرمین ڈاکٹر طارق بنوری نے جامعہ کراچی کو اپنی سیکیورٹی کا نظام بہتر بنانے کے لیے فوری پی سی ون بنانے کی ہدایت کی ہے۔
چیئرمین ڈاکٹر طارق بنوری نےجامعہ کراچی کے کنفیوشس انسٹیٹیوٹ کے دورے کے موقع پر کہا کہ جامعہ کراچی کی سخت سیکیورٹی کے لیے جامع پی سی ون بنائیں، ایچ ای سی اس کے لیے فنڈز فراہم کرے گی۔
ڈاکٹر طارق بنوری نے خود کش حملے کے نتیجے میں چینی اساتذہ کی ہلاکت کے واقع ہر گہرے دکھ اور رنج کا اظہار کیا اور اسے بڑا نقصان قرار دیا۔
اس موقع پر قائم مقام عبوری وائس چانسلر ڈاکٹر ناصرہ خاتون اور قائم مقام رجسٹرار مقصود انصاری بھی موجود تھے۔
ڈاکٹر طارق بنوری نے کہا کہ جدید سیکیورٹی جامعہ کراچی کے لیے ضروری ہے تاکہ بلاخوف طلبہ اپنی تعلیم جاری رکھ سکیں۔
انہوں نے کہا کہ ملک بھر کی جامعات کو دہشت گرد کارروائیوں سے بچنے کے لیے فل پروف سیکیورٹی سسٹم واضح کرنے کی ضرورت ہے۔
بعد اذاں جنگ سے گفگو کرتے ہوئے ڈاکٹر طارق بنوری نے کہا کہ عدالتی احکامات کے تناظر میں ہائیرایجوکیشن کمیشن نے جامعہ کراچی میں مستقل وائس چانسلر کے تقرر کے سلسلے میں امیدواروں کے تحقیقی پرچوں کی رپورٹ تلاش کمیٹی کو بھیج دی ہے جبکہ اسناد کی تصدیق کا عمل بھی مکمل ہوچکا ہے، اب یہ تلاش کمیٹی پر منحصر ہے کہ وہ کب امیدواروں کے انٹرویو کرتی ہے۔