محکمۂ صحت نے کراچی اور حیدر آباد میں کورونا وائرس کے کیسز میں اضافے پر تشویش کا اظہار کرتے ہوئے دونوں شہروں کے کمشنرز کو مراسلہ لکھ بھیجا ہے۔
محکمۂ صحت نے کراچی اور حیدرآباد کے کمشنرز کو فوری طور پر دونوں شہروں میں کورونا ایس او پیز پر عمل درآمد کرانے کی ہدایت کی ہے۔
محکمۂ صحت کے مراسلے میں کہا گیا ہے کہ شہریوں سے ماسک پہننے اور سماجی فاصلہ اختیار کرنے پر لازمی عمل درآمد کرایا جائے۔
مراسلے میں محکمۂ صحت کا کہنا ہے کہ شہریوں کے ویکسینیشن کارڈ چیک کیے جائیں، پبلک ٹرانسپورٹ مسافروں سے 70 فیصد سے زائد نہ بھری جائیں۔
محکمۂ صحت کے مراسلے میں یہ بھی کہا گیا ہے کہ دونوں شہروں میں کورونا وائرس کے سب ویرینٹ بی اے 4 اور بی اے 5 پھیلنے کا خدشہ ہے۔
دوسری جانب قومی ادارۂ صحت (این آئی ایچ) کے حکام کا کہنا ہے کہ سندھ میں کورونا کیسز میں اضافہ ہوا ہے، کیسز کی مجموعی شرح 6 اعشاریہ 10 فیصد ہو گئی۔
کراچی میں گزشتہ 24 گھنٹوں کے دوران کورونا وائرس کے مثبت کیسز کی شرح 15 اعشاریہ 85 فی صد ریکارڈ کی گئی ہے۔
شہرِ قائد میں اس دوران 1 ہزار 60 کورونا وائرس کے ٹیسٹ کیے گئے جن کے نتیجے میں 168 مثبت کیسز سامنے آئے۔
گزشتہ 24 گھنٹوں میں حیدر آباد میں کورونا وائرس کے 7 ٹیسٹ کیے گئے، جو تمام منفی آئے ہیں۔
این آئی ایچ حکام کے مطابق گزشتہ 24 گھنٹوں کے دوران کورونا وائرس کے مثبت کیسز کی شرح مردان میں 4 اعشاریہ 76 فیصد، لاہور اور میر پور آزاد کشمیر میں 2 اعشاریہ 38 فیصد ریکارڈ کی گئی۔
گزشتہ 24 گھنٹوں میں کورونا کے مثبت کیسز کی شرح پشاور میں 2 اعشاریہ 24 فیصد، اسلام آباد میں 1 اعشاریہ 63 فیصد، راولپنڈی میں 1 اعشاریہ 52 فیصد اور گلگت میں 1 اعشاریہ 42 فیصد ریکارڈ کی گئی ہے۔