وفاقی وزیر برائے ماحولیاتی تبدیلی سینیٹر شیری رحمٰن کا کہنا ہے کہ پاکستان 2025ء تک خشک سالی کا شکار ہو جائے گا۔
اسلام آباد میں شیری رحمٰن نے موسمیاتی تبدیلی کے زراعت پر اثرات کے موضوع پر کانفرس سے خطاب کرتے ہوئے کہا کہ ہمارے ڈیمز کے منصوبے 10 سے 15 سال تک مکمل نہیں ہوتے، پانی کے معاملے پر ہمیں بروقت اقدامات لینے کی ضرورت ہے۔
انہوں نے کہا کہ وزارت ماحولیات پانی کی قلت پر کل کابینہ کو بریفنگ دے گی، دنیا میں چھوٹے ڈیمز کی تعمیر کا رجحان بڑھ رہا ہے، بڑے ڈیمز کی تعمیر کے لیے بڑی تعداد میں فنڈز درکار ہوتے ہیں۔
شیری رحمٰن کا کہنا ہے کہ بھارت میں بڑے ڈیمز کے خلاف لوگ احتجاج کرتے ہیں، ہمیں اپنے وسائل کو مدنظر رکھتے ہوئے چھوٹے ڈیمز بنانے چاہیے، ہمیں اپنی منصوبوں کی ترجیحات تبدیل کرنا ہوں گی۔