بیلاروس کے وزیر خارجہ کا دورۂ پاکستان، اعلامیہ جاری

May 30, 2023

بیلاروس کے وزیر خارجہ کے دورۂ پاکستان کا اعلامیہ جاری کردیا گیا۔

اعلامیہ کے مطابق بیلاروس کے وزیر خارجہ نے 30 سے 31 مئی تک اسلام آباد کا دورہ کیا۔ بلاول بھٹو نے بیلاروس کے ہم منصب کو دورہ پاکستان کی دعوت دی تھی۔

بیلا روس کے وزیر خارجہ نے وزیراعظم شہباز شریف اور آرمی چیف جنرل عاصم منیر سے ملاقاتیں کیں۔

وزیر خارجہ سرگئی ایلینک نے وزیر اقتصادی امور ایاز صادق سے بھی ملاقات کی، جس میں دو طرفہ تعلقات کو مختلف شعبوں میں تعاون میں تبدیلی کے عملی اقدامات پر اتفاق کیا گیا۔

حالیہ برسوں میں اعلیٰ ترین سطح پر دو طرفہ ملاقاتوں اور بات چیت کو سراہا گیا۔

دونوں ملکوں کے اسٹریٹجک اسٹڈیز انسٹیٹیوٹس کے درمیان معاہدے پر دستخط کیے گئے۔

3 فروری 2024 کو پاک بیلاروس سفارتی تعلقات کی 30ویں سالگرہ منائی جائے گی۔

بیلاروس کے وزیر خارجہ نے بلاول بھٹو کو بیلاروس کے دورے کی دعوت دی جسے وزیر خارجہ نے قبول کرلیا ہے۔

دورے کی تاریخوں کو سفارتی ذرائع سے حتمی شکل دی جائے گی۔