ترین گروپ کے عون چوہدری کا کہنا ہے کہ جہانگیر ترین کی نئی جماعت کا نام فائنل کرلیا گیا۔
ایک بیان میں عون چوہدری نے کہا کہ ہماری جماعت کا نام ’استحکام پاکستان‘ ہوگا۔
اس حوالے سے جہانگیر ترین کی پریس کانفرنس جمعہ کے روز متوقع ہے۔
اس سے قبل لاہور میں متعدد سابق ارکان اسمبلی اور اہم سیاسی شخصیات نے ترین گروپ میں شمولیت کا اعلان کردیا۔
جہانگیر ترین گروپ میں شمولیت کا اعلان کرنے والوں میں سابق مشیر وزیر اعلیٰ پنجاب برائے اوقاف و مذہبی امور رفاقت علی گیلانی بھی شامل ہیں۔
چشتیاں سے سابق رکن صوبائی اسمبلی (ایم پی اے) ممتاز مہروی اور ساہیوال سے سابق ایم پی اے مہر ارشاد کاٹھیا نے ترین گروپ میں شمولیت کا اعلان کیا۔
ننکانہ صاحب سے میاں عثمان اشرف اور میانوالی سے میجر (ر) خرم روکھڑی نے جہانگیر ترین گروپ کا حصہ بننے کا اعلان کیا۔
لاہور میں جہانگیر ترین کی رہائشگاہ پر پاکپتن سے سابق ایم پی اے دیوان عظمت سید محمد چشتی نے بھی ملاقات کی۔
سیاسی شخصیات سے ہونے والی ملاقاتوں میں عبدالعلیم خان، اسحاق خاکوانی، عون چوہدری، ملک نعمان لنگڑیال، فردوس عاشق اعوان، اجمل چیمہ، امیر حیدر سنگا اور شعیب صدیقی بھی موجود تھے۔