لندن (نیوز ڈیسک) دنیا کے 4براعظموں کے بیشتر شہر موسمیاتی تبدیلی کی وجہ سے اس وقت شدید گرمی کی لپیٹ میں ہیں۔حالیہ دنوں میں درجہ حرارت میں ریکارڈ اضافے کی وجہ سے ایشیا اور یورپ میں سیکڑوں اموات رپورٹ ہوئیں۔ سعودی عرب میں حج کی ادائیگی کے دوران جاں بحق حاجیوں کی تعداد ایک ہزار سے بڑھ گئی جبکہ بھارتی دارالحکومت نئی دلی میں تقریباً 200 افراد کی جانیں گئیں اور نئی دلی میں مسلسل 38دن درجہ حرارت 40سینٹی گریڈ یا اس سے زائد ریکارڈ کیا گیا۔ ماہرین کے مطابق عالمی سطح پر ایک ہیٹ ویو جو پہلے 10سالوں میں ایک بار آتی تھی اب 10سالوں میں 2.8بار آئے گی جو 1.2سینٹی گریڈ زیادہ گرم ہو گی اسی حوالے سے ورلڈ میٹرولوجیکل آرگنائزیشن کا کہنا ہے کہ اس بات کا 86فیصد امکان ہے کہ اگلے 5سالوں میں سے ایک سال 2023 کی گرمی کو بھی پیچھے چھوڑ دے گا۔