ویانا، کراچی (اے ایف پی، نیوز ڈیسک) یورپی ملک آسٹریا کا دارالحکومت ویانا مسلسل تیسرے سال دنیا میں رہائش کیلئے بہترین شہر قرار دیا گیا ہے،غزہ جنگ کے بعد سے تل ابیب کی رینکنگ میں 20نمبرز کی کمی، 112ویں نمبر پر آگیا، کوپن ہیگن دوسرے ، زیوریخ تیسرے ، میلبرن چوتھے ، کیلگری اور جنیوا پانچویں نمبر پر، ٹوکیو اور آکلینڈ مشترکہ طور پر نویں نمبر پر ، کراچی کا 169واں ، دمشق کا 173واں نمبر رہے۔ اکنامسٹ انٹیلی جنس یونٹ (ای آئی یو) نے 2024 کے لئے دنیا بھر میں رہائش کےلئے بہترین شہروں کی فہرست جاری کی ہے۔ویانا کو اس کے مستحکم انفرا اسٹرکچر، ثقافت، تعلیم، طبی سروسز اور تفریح کے ذرائع کے باعث دنیا میں رہائش کے لیے بہترین شہر قرار دیا گیا۔ویانا کے بعد دوسرے نمبر پر یورپی ملک ڈنمارک کا شہر کوپن ہیگن موجود ہے جو گزشتہ سال بھی اسی نمبر پر موجود تھا۔سوئٹزر لینڈ کے شہر زیوریخ کے حصے میں تیسرا نمبر آیا جس کے بعد آسٹریلیا کا شہر میلبرن چوتھے نمبر پر رہا۔کینیڈا کا شہر کیلگری اور سوئس شہر جنیوا مشترکہ طور پر 5 ویں نمبر پر رہے۔ ٹاپ 10 میں ایشیا کا صرف ایک شہر شامل ہے جو جاپانی شہر اوساکا ہے جس کے حصے میں 9 واں نمبر آیا جبکہ نیوزی لینڈ کا شہر آک لینڈ بھی رہائش کے لیے دنیا کا 9 واں بہترین شہر قرار پایا۔اس فہرست میں پاکستان کا ایک ہی شہر شامل ہے اور وہ کراچی ہے، جو 169 ویں نمبر پر موجود ہے، گزشتہ سال بھی کراچی کے حصے میں یہی نمبر آیا تھا۔اگر رہائش کے لیے سب سے غیر موزوں شہروں کی بات کی جائے تو شام کا شہر دمشق 173 ویں نمبر پر ہے جس کے بعد لیبیا کا شہر طرابلس (172)، الجزائر (171) اور نائیجرین شہر لاگوس (170) موجود ہے جبکہ ڈھاکا کے حصے میں 168 واں نمبر آیا۔