تم بھول گئے ہو
تم نے اڑتیس سال پہلے
ہمارے بچوں کو خود کش جیکٹ بنانا
اور پاکستان کے اس زمانے کے جلاّد نے
جہاد کا بے جا لفظ استعمال کرنا
سکھایا تھا
اُسی زمانے میں تم نے پاکستان
کو سب سے فیورٹ قوم کہا تھا
ہم نے اس القاب کو قابل فخر
ندا اس وقت سمجھا تھا نہ آج تک
اس گمرہی کے گمان میں ہیں
تمہیں یاد دلائوں
تم نے بھٹو کو پھانسی پر چڑھوایا تھا
تم نے برہند بچیوں کو خود ہی
رسوا کیا اورخود ہی ان پر
کتاب بھی لکھوا ئی
ویت نام سے لیکر شام اوریمن تک
تمہاری ایف آئی آر بہت طویل ہے
سچ ہے ہم نے ہی یثرب رستے آئی
فنڈنگ سے ، اسلام کے جعلی حروف میں
لپٹا ہوا بے معنی جہاد
صرف اور صرف
تمہارے کہنے پر، دنیا بھر میں پھیلایا
مختاراں مائی پر کتاب
پھر وقت پڑنے پر تم نے ہی
ہمیں مجرم ٹھہرایا
سچ ملے یثرب ہی سے کہا
حافظہ اور سعدی کے دیس سے
نوجوانوں کے علاوہ عورتوں کو بھی
اس نحوست میںشامل کروایا
اب تو کیا یورپ، کیا باقی دنیا
میرے پڑھے لکھے مسلمان نوجوان
انسانیت کے نام پر دھبہ بنے ہوئے ہیں
تم نے ان دجاّلوں کا ساتھ دیا
جنہوں نے فلسطینیوں سے
سستی زمینیں خرید کر
اپنے ملک کا اعلان کیا
وہی لوگ القدس کی مسجد میں
مسلمانوں کو سجدہ نہیں کرنے دیتے
سب کچھ بوڑھے ریچھ تمہارے کہنے پر
ہو رہا ہے!
اب وہ تمہارے چہیتے ہوگئے ہیں
جو زعفران کے کھیتوں میں
گولیاں بورہے ہیں
دنیا کے امن کو
تمہاری زہر میں بجھی تقریریں
تباہ نہیں کرسکتی ہیں
ہم تو اپنے ملک کے لوگوں کا ذہن بھی
نہیں پڑھ سکتے ہو
تم تباہی کا طاعون پھیلانے والے
عورتوں کو ٹشو پیپر کی طرح استعمال
کرنے والے بوڑھے ریچھ ہو
تمہاری خریدی ہوئی صدارت کو
تاریخ شداد کی طرح یاد کرے گی
ہماری فکر مت کرو
ہم تو فرقوں کے نام پر
ایک دوسرے کا سر تن سے جدا کرکے
اللہ و اکبر کہتے ہیں
ہم تو عباسیوں کے زمانے سے
قتل کرنے والوں کو تخت پر بٹھاتے آئے ہیں
ہم اچھے مسلمان نہیں
اس لئے ڈاکٹر روتھ
ساری عمر پاکستانیوں کی خدمت کرنے کے باوجود
مسلمان نہیں ہوئی
مگر ہم سچے جان پہ کھیل جانے والے
پاکستانی ہیں
بھورے ریچھ ! تمہاری حمایت
کوئی قوم نہیں کرے گی!
جرمن خاتون
.