بیت السکون کینسر اسپتال کراچی کے مریضوں کے لیے فنڈز اکٹھا کر نے کیلئے داؤد پبلک اسکول کے تحت فیسٹیول آف لائٹس کا انعقاد کیا گیا۔
کراچی میں منعقد ہونے والی روشنیوں کی رنگارنگ تقریب سے خطاب کرتے ہوئے خاتون استاد کا کہنا تھا کہ بیت السکون کینسر اسپتال کے مریضوں کے لیے فنڈز اکٹھا کر نے کیلئے طلباء، رضاکار، اساتذہ اور والدین کی مشترکہ محنت اور کوششیں قابل تحسین ہیں۔
انہوں نے کہا کہ بچوں میں تعلیم کے ساتھ جذبہ ایثار کو فروغ دینے اور ان کو معاشرے میں ایک کامیاب انسان اور ذمہ دارشہری بنانا ضروری ہے تاکہ وہ معاشرے کے مستحق افراد کے کام آسکیں۔
طلباءنے اس تقریب میں روشنی سے متعلق منفرد اور دلچسپ سرگرمیوں کا اہتمام کیا جس کے ذریعے حاصل شدہ فنڈز کو بیت السکون کینسر اسپتال کے مستحق مریضوں کے مفت علاج کے لیے استعمال کیا جائے گا۔
تقریب میں لائٹ پریڈ خاص طور پر توجہ کا مرکز بنی جس میں چمکدار لباس پہنی چھوٹی بچیوں کے گروپ نے پرفارم کیا۔
اس موقع پر طلباء نے فیس پینٹنگ، نیل آرٹ سمیت دیگر سرگرمیوں میں حصہ لیا جبکہ تقریب کے اختتام میں شاندار آتش بازی کا مظاہرہ بھی کیا گیا۔