مقبوضہ کشمیر میں بھارت کی جانب سے کی جانے والی جارحیت کے خلاف جنوبی وزیرستان میں قبائلیوں نے کانی گرم اور سام کے مقام پر احتجاجی جلوس نکالا اور دھرنا دیا۔
جنوبی وزیرستان کے قبائلیوں اور اسکول کے طلباء نے وادی کانی گرم اور سام پر احتجاجی جلوس نکالے۔
مظاہرین سے خطاب کرتے ہوئے قبائلی رہنماؤں کا کہنا تھا کہ مقبوضہ وادی میں بھارت کی بربریت تمام حدوں کو پار کر چکی ہے۔
قبائلی رہنماؤں نے کشمیر کے مسئلےکو جلد از جلد حل کرانے پر زور دیتے ہوئے کہا کہ پاکستان میں پائیدار امن مسئلہ کشمیر کے ساتھ جڑا ہوا ہے۔
انہوں نے یہ بھی کہا کہ ملک دشمن عناصر افغانستان میں بیٹھ کر پاکستان میں بد امنی پھیلانے کی سازش کر رہے ہیں لیکن محب وطن عوام کی موجودگی میں پاکستان دشمن عناصر اپنے عزائم میں کامیاب نہیں ہوسکیں گے۔