عوامی نیشنل پارٹی کے سربراہ اسفند یار ولی کا کہنا ہے کہ سینیٹ الیکشن کے حوالے سے اب تو سراج الحق نے بھی کہہ دیا ہے کہ عمران خان نے کہا تھا کہ بلوچستان والے کو ووٹ دینا ہے، اُوپر سے حکم آیا ہے، اس کے بارے میں قوم کو حقیقت کا پتہ چلنا چاہئے۔
چارسدہ میں ورکرز کنونشن سے خطاب میں سربراہ اے این پی نے تحریک انصاف کی حکومت کو تنقید کا نشانہ بناتے ہوئے کہا کہ دورہ کے پی کے میں چیف جسٹس ثاقب نثار نے بھی کہہ دیا کہ صوبے میں کوئی تبدیلی نظر نہیں آئی۔
انھوں نےکہا کہ پی ٹی آئی کی تبدیلی یہ ہے کہ اپنے لوگوں کو پیچھے دھکیلا جائے اور دوسری پارٹیوں کے لوگ شامل کئے جائیں۔
فاٹا کے انضمام کے حوالےخطاب میں اسفندیارولی نے کہا کہ دو سیاسی پارٹیوں کے علاوہ تمام پارٹیاں چیخ رہی ہیں کہ فاٹا کو کے پی کے میں ضم کیا جائے، اگر مولانا ایک فون سے فاٹا کو کے پی کے میں انضمام سے روک سکتے ہیں تو پھر اسلامی نظام کے نفاذ کیلئے بھی نواز شریف کو فون کرتے۔
اسفندیار ولی نے کہا کہ عمران خان نے ووٹ بیچنے والوں کو تو سزا دیدی لیکن ووٹ خریدنے والے چوہدری سرور کے خلاف کارروائی کب ہوگی۔