وہ ایک تارا سحر میں چمکا
تو اُس نے دیکھا
وہ چاند نیچے زمیں پہ اُترا
تو اُس نے دیکھا
فلک نے
آنکھیں جھپک کے دیکھا
ہوا نے
رک کے، ٹھٹھک کے دیکھا
حرا میں آیا تھاآسمانوں کا
برگزیدہ بڑا فرشتہ
نبیؐ وہ پیارے، درود اُنؐ پر
پڑھا رہا تھا انہیں فرشتہ
وہ رب ہے برتر، وہ رب ہے اعلیٰ
وہ جس نے انسان کو بنایا
وہ جس نے بھیجا ہے اپنی رحمت کا خاص تحفہ
کتابِ روشن، نیا صحیفہ
جو ساتھ لائی ہے زندگی کا نیا قرینہ
اُس ایک رب کا ہی نام لے کر پڑھو، پڑھاؤ
کتاب کو زندگی بناؤ
زمین پر روشنی بڑھاؤ
زمین والو! خوشی مناؤ
زمیں پہ اُترا ہے لفظ ’’اقراء‘‘