نئی دہلی (جنگ نیوز ) فرانس سے رفائیل طیاروں کی خریداری میں اربوں روپے کی کرپشن کے الزام کے بعد مودی حکومت خطرے میں پڑ گئی ، اپوزیشن نے بدعنوانی کے الزامات پر مودی سے استعفے کا مطالبہ کردیا ۔ بھارتی سیاسی جماعتوں نے سابق فرانسیسی صدر کے انکشاف کے بعد وزیر اعظم نریندر مودی پر بد عنوانی کا الزام عائد کرتے ہوئے کہا ہے کہ ان طیاروں کی قیمت اصل سے زیادہ ادا کی گئی تھی اور خریداری کے عمل کو شفاف نہیں رکھا گیا تھا ۔ حالیہ کچھ ماہ میں بھارت میں اپوزیشن جماعتوں نے یہ اعتراض اٹھایا ہے کہ عشروں سے اس کام کا تجربہ رکھنے والی سرکاری کمپنی کی جگہ معروف بھارتی بزنس مین انیل امبانی کی کمپنی ’ریلائینس ڈیفنس‘ کو یہ کانٹریکٹ کیوں دیا گیا ۔ گزشتہ دنوں 20 ستمبر کو سابق فرانسیسی صدر اولاند کے ایک بیان کے حوالے سے یہ خبر سامنے آئی تھی کہ جب وہ صدارتی دفتر میں تھے تب اس معاہدے کے وقت بھارتی حکومت نے داسولٹ ایوی ایشن فرم پر دباؤ ڈالا تھا کہ وہ یہ سودا امبانی کی ’ریلائنس ڈیفنس‘ کو دے ۔ اولاند نے یہ بات فرانسیسی میڈیا سے گفتگو میں کہی تھی ۔ان کا اپنے انٹرویو میں کہنا تھا کہ ہمارے پاس اور کوئی راستہ نہیں تھا ، ہمیں یہ دباؤ قبول کرنا پڑا ۔دفاعی معاہدوں کے بھارتی قوانین کے تحت کسی بھی غیر ملکی کمپنی کو طے پانے والی اپنی ڈیل کے کم سے کم 30 فیصد حصے کی سرمایہ کاری لازمی طور سے بھارت میں کرنی چاہیے ۔