سندھ کھو کھو ایسوسی ایشن کے زیراہتمام ایک روزہ کھو کھو کوچنگ کلینک کا انعقاد کیا گیا جس کے مہمان خصوصی ڈپٹی ڈائریکٹر اسپورٹس اینڈ کلچر کے ایم سی جمیل احمد تھے جبکہ سندھ اولمپک ایسوسی ایشن کے سیکرٹری احمد علی راجپوت نے تقریب کی صدارت کی ۔
کورس میں کھلاڑیوں اور آفیشلز کو کھیل کی تیکنک کے بارے میں آگہی دی گئی، سندھ کھو کھو ایسوسی ایشن کے چیئرمین عارف وحید نےکہا کہ پاکستان کھو کھو ٹیم آئندہ سال فروری میں ہونے والی ایشین چیمپئن شپ میں شرکت کرے گی ۔
36 نیشنل جونیئر ہاکی چیمپئن شپ کا ٹائٹل پاکستان واپڈا ٹیم نے جیت لیا۔ واپڈا نے فائنل کسٹمز ٹیم کو پانچ صفر سے زیر کیا جبکہ تیسری پوزیشن کے میچ میں سوئی سدرن گیس کمپنی ٹیم نے پنجاب اے کو شکست دیکر وکٹری سٹینڈ تک رسائی حاصل کی۔
بہترین کھلاڑی کا ایوارڈ پنجاب اے کے عمیر کو دیا گیا۔ ٹورنامنٹ کی اختتامی تقریب کے مہمان خصوصی پاکستان ہاکی فیڈریشن کے صدر بریگیڈئر (ر) خالد سجاد کھوکھر اور سابق صدر پی ایچ ایف اولمپیئن اختر رسول تھے جنہوں نے کھلاڑیوں میں انعامات تقسیم کیے۔پاکستان نیٹ بال ٹیم سائوتھ ایشین نیٹ بال چیمپین شپ (بھارت)، ایشین نیٹ بال چیمپین شپ (سنگاپور) اور عالمی نیٹ بال کپ (آسٹریلیا) میں شرکت کرے گی۔
کلکٹر کسٹمز پریونٹیو ثاقب سعید نے قومی جونیئر ہاکی چیمپئن شپ میں دوسری پوزیشن حاصل کرنے والی کسٹمز جونیئر ہاکی ٹیم کے لئے پانچ لاکھ روپے انعام کا اعلان کیا ہے، ٹیم کے کھلاڑیوں سے اپنے دفتر میں ملاقات کے دوران انہوں نے ایونٹ میں ٹیم کی کار کردگی کو قابل تعریف قرار دیا، اس موقع پر پاکستان ہاکی فیڈریشن کے سکریٹری آ صف باجوہ، ٹیم کے کوچ دانش کلیم، محمد علی خان اور صمصام شاہ بھی موجود تھے۔
کلکٹر کسٹمز نے کہا کہ کھلاڑیوں نے قومی جونیئر ایونٹ میں اپنی شان دار کارکردگی سے ثابت کردیا ہے کہ وہ باصلاحیت ہیں ، ادارہ ان کو مستقبل میں مزید سہولت فراہم کرے گا، اس موقع پر پی ایچ ایف کے سکریٹری آ صف باجوہ نے کہا کہ کسٹمز نے ماضی میں قومی ہاکی ٹیم کو کئی نامور کھلاڑی دئیے ہیں، ایک بار پھر اس ادارے سے امید ہے کہ وہ کھلاڑیوں کو ملازمت دینے کے علاوہ ان کو بہتر سہولت بھی دے گا، انہوں نے کہا کہ قائد اعظم گولڈ کپ ہاکی ٹور نامنٹ اس ادادے کی پہچان تھا، ملاقات میں اس ایونٹ کی بحالی کے لئے کسٹمز حکام نے مثبت یقین دہانی کرائی ہے۔
نارتھ ناظم آباد جیم خانہ ٹرسٹ کے زیراہتمام پہلی تائی کوانڈو چیمپئن شپ کا انعقاد کیا گیا ،اس موقع پر نارتھ ناظم آباد جیم خانہ ٹرسٹ کے صدر فیروز عالم لاری، سینئر نائب صدر کیپٹن اے معیز خان،چیئرپرسن اسپورٹس کمیٹی مسزاسما ء علی شاہ اورداکارہ قندیل جعفری نے کامیاب کھلاڑیوں میں انعامات تقسیم کئے۔