اٹک(جنگ نیوز ) تحریک لبیک کا اٹک کا رہائشی کارکن دہشت گردی مقدمے میں 55سال قید کی سزا ہونے پر جمعہ کو شادی کے روز جیل کی سلاخوں کے پیچھے چلاگیا۔
مجرم عاطف دہشت گردی کے مقدمے میں سزا پانے والے 87 کارکنوں میں شامل ہے۔
عدالت نے پنڈی گھیب سے تعلق رکھنے والے 87 کارکنوں کو مجموعی طور پر ،پچپن پچپن سال قید ،دو دو لاکھ جرمانہ اور جائیدادیں ضبط کرنے کی سزا سنائی۔
عاطف کی گزشتہ روزبارات تھی لیکن دولہا کے ارمانوں پر تب اوس پڑ گئی جب عدالتی سزا سنائے جانے کے بعد عاطف کو اپنے دوستوں کے ساتھ بارات کی بجائے پولیس کے ساتھ جیل جانا پڑ گیا ۔