دنیا بھر میں تیزی سے پھیلتے جان لیوا کورونا وائرس سے دوچار پاکستان سے اظہار یکجہتی کرنے کے لیے سوئزرلینڈ کے قصبے زرمٹ کے مشہور پہاڑ میٹرہارن کو پاکستانی جھنڈے کے رنگ میں رنگ دیا گیا۔
سماجی رابطے کی ویب سائٹ ٹوئٹر پر ’زرمٹ میٹرہارن‘ کے ٹوئٹر اکاؤنٹ پر پاکستانی پرچم میں رنگے پہاڑ کی تصویر شیئر کی گئی۔
ٹوئٹ میں یہ بھی بتایا گیا کہ پاکستان جہاں سوئیزر لینڈ جیسے بلند پہاڑ موجود ہیں، وہاں کورونا وائرس کے تیزی سے پھیلاؤ کے سبب ہم پاکستانی عوام کیساتھ اظہار یکجہتی کرتے ہیں اور ان کی ہمت کیلئے دعا گو ہیں۔
اپنے طرز کے اس مختلف اظہارِ یکجہتی پر ترجمان دفتر خارجہ عائشہ فاروقی نے اس خوبصورت پیغام کے لیے سوئزرلینڈ حکام کا شکریہ ادا کیا۔
انہوں نے اپنے پیغام میں یہ بھی لکھا کہ سوئس کنفیڈریشن کے عوام کی طرح پاکستان کے عوام بھی صبر و تحمل سے اس وبا کا مقابلہ کررہے ہیں۔
انہوں نے یہ بھی لکھا کہ ہم باہمی تعاون کے ذریعے اس عالمی بحران پر جلد قابو پالیں گے۔
میٹرہارن پر ناصرف پاکستانی پرچم بلکہ ایران، جنوبی افریقا اور بھارت سمیت دیگر ممالک کے پرچم بھی روشن کئے گئے۔
سینیٹر فیصل جاوید خان نے بھی اپنے ایک سوشل میڈیا پیغام میں میٹرہارن پر آویزاں پاکستانی پرچم کی تصویر شیئر کی۔
انہوں نے بتایا کہ اس کا مقصد کورونا جیسی عالمی وبا سے نمٹنے کے سلسلے میں تمام پاکستانیوں کو امید اور طاقت کا پیغام بھیجنا ہے۔