سندھ ہائی کورٹ نے کراچی کے علاقے گلستانِ جوہر میں چائنا کٹنگ اور زمینوں پر قبضے کے خلاف درخواست کی سماعت کرتے ہوئے کے ڈی اے کو گلستانِ جوہر میں گرینڈ آپریشن کا حکم دے دیا۔
عدالتِ عالیہ نے ریمارکس دیئے کہ سپریم کورٹ آف پاکستان کے حکم کے مطابق تجاوزات فوری ختم کرائی جائیں۔
سندھ ہائی کورٹ نے غیر قانونی تعمیرات کو مسمار کرنے کا بھی حکم دے دیا۔
عدالتِ عالیہ نے ڈی جی رینجرز اور ڈی آئی جی ایسٹ کو کے ڈی اے سے تعاون اور سپریم کورٹ کے حکم پر اس کی روح کے مطابق عمل کرانے کی ہدایت بھی کی۔
درخواست گزار کی جانب سے سندھ ہائی کورٹ سے درخواست کی گئی ہے کہ کےایم سی اور کے ڈی اے حکام قبضہ مافیا کی سرپرستی کر رہے ہیں۔
درخواست گزار نے یہ بھی بتایا کہ عدالتی حکم کے باوجود قابضین کو نہیں ہٹایا جاسکا۔
ڈائریکٹر کے ڈی اے نے کہا کہ کارروائی کے لیے جاتے ہیں تو شر پسند عناصر حملہ کر دیتے ہیں۔
سندھ ہائی کورٹ نے حکم دیا کہ رینجرز اور پولیس، کے ڈی اے حکام کو نفری فراہم کریں۔