واشنگٹن(جنگ نیوز )امریکی صدر ڈونلڈ ٹرمپ نے ایک ایکٹ کو قانون بنانے کیلئے دستخط کردیے جس کے مطابق میرٹ کی بنیاد پر اعلیٰ تعلیم کے اسکالر شپ پروگرام کے تحت 50 فیصد تعلیمی وظائف پاکستانی خواتین کو دیے جائیں گے۔مذکورہ ایکٹ ملالہ یوسف زئی کے نام سے منسوب ہے۔قبل ازیں رواں ماہ امریکی کانگریس نے مجوزہ قانون کی منظوری کے بعد صدر کے دستخط کے لیے وائٹ ہاؤس ارسال کردیا تھا۔وائٹ ہاؤس سے جاری ایک بیان میں کہا گیا کہ ʼ13 جنوری کو صدر نے ملالہ یوسف زئی ایکٹ نامی قانون پر دستخط کردیے جو امریکی ادارہ برائے بین الاقوامی ترقی (یو ایس ایڈ) کو میرٹ اور ضرورت کی بنیاد پر اسکالر شپس کے پروگرام کے کم از کم 50 فیصد تعلیمی وظائف پاکستانی خواتین کو فراہم کرنے کی ہدایت کرتا ہے۔مذکورہ بل سب سے پہلے گزشتہ برس مارچ میں ایوان نمائندگان سے منظور ہوا تھا جس کے بعد یکم جنوری کو امریکی سینیٹ نے بھی اس کی منظوری دے دی تھی۔