پاکستان پیپلز پارٹی کی رہنما اور رکن سندھ اسمبلی شرمیلا فاروقی نے سابق وزیرِاعظم شہید بے نظیر بھٹو کی بڑی صاحبزادی بختاور بھٹو کے لیے سوشل میڈیا پر محبت بھرا پیغام جاری کیا ہے۔
بختاور بھٹو زرداری آج اپنا 31 واں یومِ پیدائش منا رہی ہیں اور اس ضمن میں اُنہیں جہاں دُنیا بھر سے مختلف پیغامات موصول ہورہے ہیں تو وہیں پی پی رہنما شرمیلا فاروقی نے بھی اُن کے لیے خصوصی پیغام جاری کیا ہے۔
شرمیلا فاروقی نے سماجی رابطے کی ویب سائٹ ٹوئٹر پر بختاور بھٹو اور محمد چوہدری کی منگنی کی تقریب کی دلکش تصویر شیئر کی ہے۔
مذکورہ تصویر میں جلد ہی شادی کے بندھن میں بندھنے والا یہ جوڑا بلاول ہاؤس کراچی میں موجود ہے۔
بختاور بھٹو خوبصورت عروسی لباس میں ملبوس ہیں جبکہ اُن کے منگیتر نے سفید لباس زیب تن کیا ہوا ہے۔
شرمیلا فاروقی نے تصویر کے کیپشن میں بختاور بھٹو کو سالگرہ کی مبارکباد دی۔
اُنہوں نے بختاور بھٹو کو دُعا دیتے ہوئے لکھا کہ ’آپ رواں سال اور زندگی کے تمام سالوں میں ایسے ہی خوش رہیں۔‘
واضح رہے کہ بختاور بھٹو زرداری 25 جنوری 1990 کو کراچی میں پیدا ہوئیں، بختاور بھٹو زرداری نے انگریزی ادب میں ایم اے اور گریجویشن ایڈن برگ یونیورسٹی سے پاس کیا۔
بختاور بھٹو زرداری کی شادی کی تقریبات کا آغاز بھی ہوگیا ہے، بختاور بھٹو کے محمود چوہدری سے نکاح کی تقریب 29 جنوری کو منعقد کی جائے گی جبکہ ’بارات‘ کی تقریب 30 جنوری کو ہوگی۔