پاکستان تحریکِ انصاف کے رہنما اور وفاقی وزیر فیصل واؤڈا کا استعفیٰ قومی اسمبلی سیکریٹریٹ کو موصول ہونے کی تصدیق ہو گئی ہے۔
اسلام آباد ہائی کورٹ میں دی گئی استعفے کی کاپی پر استعفے کی قومی اسمبلی سیکریٹریٹ کو وصولی کے سلسلے میں دستخط اور مہر موجود ہیں۔
اسپیکر قومی اسمبلی اسد قیصر کے سیکریٹری شہر یار خان نے فیصل واؤڈا کا استعفیٰ وصول کر کے دستخط کیئے اور اس پر مہر لگائی۔
فیصل واؤڈا کے استعفے کو عدالتی ریکارڈ پر موجود فائل کا حصہ بنا دیا گیاہے۔
اس سے قبل آج صبح فیصل واؤڈا کی نا اہلی کے کیس میں ان کے وکیل نے اسلام آباد ہائی کورٹ کو بتایا تھا کہ فیصل واؤڈا نے بطور رکنِ قومی اسمبلی استعفیٰ دے دیا ہے۔
فیصل واؤڈا کے وکیل نے واؤڈا کا قومی اسمبلی کی رکنیت سے استعفیٰ عدالت میں پیش کیا تھا اور عدالت سے کہا تھا کہ استعفے کے بعد یہ پٹیشن غیر مؤثر ہو گئی ہے۔
اسلام آباد ہائی کورٹ کے جسٹس عامر فاروق نے کیس کا فیصلہ محفوظ کر لیا تھا جو آج ہی سنائے جانے کا امکان ہے۔