پاکستان پیپلز پارٹی کے سیکرٹری اطلاعات فیصل کریم کنڈی کا کہنا ہے کہ اپوزیشن کے خلاف اپوزیشن جماعتوں کا اجلاس حکومت کی سہولت کاری ہے، پی ڈی ایم کے خفیہ اجلاس نے شکوک و شبہات کو جنم دیا ہے۔
فیصل کریم کنڈی نے اپنے ویڈیو بیان میں کہا کہ پی ڈی ایم کا خفیہ اجلاس بلانے کے کیا مقاصد ہو سکتے ہیں۔
انہوں نے کہا کہ پیپلز پارٹی پی ڈی ایم کی بانی جماعت ہے، رات کے اندھیروں میں خفیہ ملاقاتیں کرنے والے اب اجلاس بھی خفیہ بلانے لگ گئے۔
فیصل کریم نے کہا کہ پی ڈی ایم کی بانی جماعت کو شوکاز نوٹس کا مطالبہ کرنے والے اپنے اندر جھانکیں، پی ڈی ایم حقیقی جمہوریت کی بحالی کیلئے بنی تھی کسی ایک جماعت کی سہولت کاری کیلئے نہیں۔
پی پی رہنما نے کہا کہ یوسف رضا گیلانی کی جیت کے بعد تحریک عدم اعتماد کی مخالفت کرنیوالوں نے عمران خان کی سہولت کاری کی، اب بھی کون ڈیل کی آس لگا کر بیٹھا ہے اور کون پھر باہر جانا چاہتا ہے سب کو پتا ہے۔
فیصل کریم کنڈی نے کہا کہ اگر پی پی پی کی ڈیل ہوتی تو ہمارے مقدمے دوبارہ نہ کھلتے بلکہ دوسروں کی طرح ریلیف ملتا۔