اولمپکس میں احتجاج ،منگولین کوچزنے شرٹ اور جوتے اتار دیئے

ریو اولمپکس میں مقابلوں کے آخری روز ریسلنگ ایرینا میں اُس وقت بدمزگی پیداہوگئی جب منگولین کوچز نے اپنے پہلوان کے خلاف فیصلہ آنے پر احتجاجاً شرٹ اور جوتے ججز کے سامنے اُتار دیئے۔

ریسلنگ مینز فری اسٹائل کی 65 کلو گرام کیٹیگری میں کانسی کے تمغے کے لیے منگولیا اور اُزبکستان کے درمیان مقابلہ ہورہا تھا۔

کھیل کے آخری لمحات میں منگولیا کے ریسلر حریف پر ایک پوائنٹ کی برتری لیے ہوئے تھے لیکن جب مقابلے کے بعد نتیجہ آیا تو ججز نے ازبک پہلوان کو فاتح قرار دیا۔

ججز کا کہنا تھا کہ منگولیا کے پہلوان آخری لمحات میں اُزبک پہلوان سے دور دور رہے اور اُن سے فائٹ نہیں کی جبکہ اس دوران وہ اپنے ایک کوچ کو بھی ریسلنگ میٹ پر لے آئے۔

اس فیصلے پر منگولیا کے پہلوان کے دونوں کوچز نے اپنی شرٹس اور جوتے احتجاجاً ججز کے سامنے اُتاردیئے۔