کوئٹہ اسپتال میں کانگو وائرس کے مشتبہ مریضوں کو لائے جانے کا سلسلہ جاری ہے،دو مزید مشتبہ مریض آئسولیشن وارڈ منتقل کردئیے گئے۔
فاطمہ جناح جنرل اینڈ چسٹ اسپتال حکام کے مطابق اسپتال کی وبائی امراض وارڈ میں دو مزید مشتبہ مریضوں کو داخل کرایا گیا ہے، ایک کوئٹہ اور ایک لورالائی سے لایا گیا ہے جبکہ اس سے قبل اسپتال میں چار مریض داخل تھے۔
گزشتہ روز کانگو وائرس میں مبتلا مریض سمیت دو مریضوں کو صحت یابی کے بعد فارغ کردیا گیاتھا۔
اسپتال حکام کے مطابق اس وقت آئیسولیشن وارڈ میں داخل چاروں مشتبہ مریضوں کی حالت بہتر ہے اور ان کے خون کے نمونے پی سی آر ٹیسٹ کے لئے کراچی بھجوائے جارہے ہیں۔
تاہم اسپتال میں کانگو وائرس کے ٹیسٹ کی سہولیات نہ ہونے کی وجہ سے مریضوں اور ان کے اہل خانہ کو مشکلات کا سامنا ہے۔