قدرتی آفات: پاکستان اور ایشیائی بینک کے درمیان معاہدہ

ایشیائی ترقیاتی بینک پاکستان کو قدرتی آفات سے بچاؤ کیلئے 20 کروڑ ڈالر قرض دےگا، پہلی قسط کے لیے پاکستان اور ایشیائی بینک کے درمیان معاہدے پر دستخط ہوگئے ۔

پاکستان اور ایشیائی ترقیاتی بینک کے درمیان تعاون کے معاہدے پر دستخطوں کی تقریب میں وزیر خزانہ اسحاق ڈار بھی شریک ہوئے۔

سیکریٹری اقتصادی امور ڈویژن طارق باجوہ نے معاہدے پر دستخط کئے۔

اس موقع پر وزیر خزانہ اسحاق ڈار کا کہنا تھا کہ ایشیائی ترقیاتی بینک کے تعاون کا خیر مقدم کرتے ہیں،فنڈ کے لئے ایک ارب ڈالر ایشیائی ترقیاتی بینک 5 اقساط میں فراہم کرے گا۔

اسحاق ڈار نے بتایا کہ ایشیائی ترقیاتی بینک سے طویل عرصے سے مذاکرات جاری تھے،اس معاہدے سے مستقبل میں قدرتی آفات سے نمٹنے میں مدد ملے گی۔