میکسیکو سے ملحق سرحدی دیوار بہت جلد تعمیر ہوگی ، ٹرمپ

امریکی صدر ڈونلڈ ٹرمپ نے ایک بار پھر کہا ہے کہ میکسیکو سرحد پر دیوار ضرور تعمیر ہوگی اور وقت سے پہلے ہوگی ۔ دنیا کی سب سے عظیم ملٹری فورس بنائیں گے۔ دہشت گردہمیں نقصان پہنچانےکےقابل نہیں رہیں گے جبکہ میڈیا پر تنقید کرتے ہوئے کہا غیر مصدقہ خبریں چلانے سے گریز کیا جانا چاہیے۔ذرائع کا نام بتائے بغیر خبر دینے کی اجازت نہیں ہونی چاہیے۔

کنزرویٹو پولیٹیکل ایکشن کانگریس کی سالانہ تقریب سے خطاب میں امریکی صدر ڈونلڈ ٹرمپ کا کہنا تھا کہ برے لوگوں کو ملک سے باہر نکالا جائے گا۔

ٹرمپ نے کہا کہ وہ داعش کو مکمل ختم کرنے کے منصوبے پر بھی کام کر رہے ہیں،غیر ملکی دہشت گرد امریکا کو نقصان پہنچانے کے قابل نہیں ہوں گے اگر وہ امریکا کے اندر آ ہی نہیں سکیں ۔

صدر ٹرمپ نے سویڈن میں حملے سے متعلق اپنے ایک غلط دعوے پر کہا کہ سویڈن کے معاملے ان پر کافی تنقید کی گئی۔ ان کا کہنا تھا مجھے سویڈن سے پیار ہے اور وہاں کے لوگ جانتے ہیں کہ میں ٹھیک ہوں ۔

انھوں نے فرانس میں ہونے والے حملوں کا ذکر کرتے ہوئے کہا کہ ان کا ایک دوست پیرس جانا پسند کرتا تھا لیکن اب اس نے وہاں جانا چھوڑ دیا ہے کیوںکہ پیرس اب پیرس نہیں رہا ۔

ایک بار پھر میڈیا کو تنبیہ کرتے ہوئے ٹرمپ نے کہا کہ ہمیں جعلی اور غلط خبروں کا سامنا ہے، میڈیاغیرمصدقہ خبریں استعمال نہ کرے ۔ صحافیوں کو نامعلوم ذرائع پر مبنی رپورٹ جاری کرنے کی اجازت نہیں دی جانی چاہیے۔

دوسری جانب صدر ٹرمپ نے ایک نیا صدارتی حکم نامہ جاری کیا ہے جس کے تحت تمام وفاقی اداروں میں ایک ٹاسک فورس قائم کی جائے گی جس کا مقصد غیر ضروری کاروباری ضوابط میں کمی لانا ہے تاکہ کاروباری سرگرمیوں کو مزید فروغ دیا جاسکے ۔