تھر میں کوئلہ نکالنے کیلئے تیزی سے کام جاری

تھر میں کوئلہ نکالنے کے لئے تیزی سے کام ہورہا ہے۔ اب تک 70 میٹر سے زائد کھدائی کی جاچکی ہے۔

عام طور پر کہا جاتا ہےپاکستان کے توانائی بحران کا حل تھر میں دفن ہے، گزشتہ سال اپریل میں تھر کے ایک بلاک سے سالانہ 38 لاکھ ٹن کوئلہ نکالنے کے کام کا آغاز ہوا۔ تھر کی زمین ریتیلی ہے اس لئے یہاں اوپن پٹ میں کام ہوگا جس کے لئے 112 کیوبک میٹر ریت ہٹانے کا کام جاری ہے۔

سندھ اینگرو کول مائننگ کمپنی کے عہدیدار آفتاب نعیم پاشا نے کہا کہ مائننگ کمپنی مستقبل میں کول فیلڈ کو مغرب کی جانب بڑھائے گی جہاں تقریباً دو کلو میٹر پر آبادی ہے، جسے دوسری جگہ منتقل کرنےکے لئے گھر تعمیر کئے جارہے ہیں۔

انہوں نے کہا کہ رہائش کے علاوہ تھر کول منصوبہ لوگوں کو روزگار بھی فراہم کررہا ہے۔ ایک جانب یہ پیش رفت ہے اور دوسری جانب کوئلے سے 330 میگا واٹ بجلی بنانے کے دو پلانٹ پر کام جاری ہے۔

انہوں نے 2019 کی پہلی ششماہی تک تھر سے نکلنے والے کوئلےسے بجلی بننے کا عمل شروع ہونے کی امید ظاہر کی ہے۔