راؤتحسین کی ڈان لیکس انکوائری رپورٹ کے حصول کی درخواست

سابق پی آئی او راؤتحسین کی ڈان لیکس انکوائری رپورٹ کے حصول کی درخواست پر اسلام آباد ہائی کورٹ میں سماعت کی گئی۔

دوران سماعت درخواست گزار کے وکیل کا کہنا تھا کہ جس میٹنگ کی خبر لیک ہوئی راؤ تحسین اس میں نہیں تھے۔

اسلام آباد ہائی کورٹ کے جسٹس عامر فاروق نے درخواست کی سماعت کی جس میں راؤ تحسین کی پیروی سینئر ایڈووکیٹ وسیم سجاد نے کی ۔

ان کا کہنا تھا کہ انکوائری کمیشن کی رپورٹ کی کاپی نہیں دی جا رہی، جس میٹنگ کی خبر لیک ہوئی راؤ تحسین اس میں نہیں تھے، پھر بھی خبر لیک معاملے پر سنجیدہ الزامات لگا کر کارروائی کی گئی۔

سماعت کے دوران جسٹس عامر فاروق نے سوالات کیے رپورٹ پبلک کرنا یا نہ کرنا حکومت کی صوابدید ہے یا نہیں؟ ، اس معاملہ پر متعلقہ قانون کیا کہتا ہے؟

سماعت کے موقع پر عدالت نے متعلقہ ایکٹ جمع کرانے کی ہدایت بھی جاری کردی ۔