پاکستان کی سرکاری ایئرلائن کمپنی پی آئی اے کے طیارے میں ایک مسافر کی جانب لال بیگوں کی موجودگی کی ویڈیو سوشل میڈیا پر جاری کیے جانے کے بعد دنیا بھر میں ویڈیو دیکھنے والوں نے کراہیت اور ناگواری کا اظہار کیا ہے۔
برطانوی خبر رساں ادارے کی رپورٹ کے مطابق محمد جامی نامی مسافر کی جانب سے ریکارڈ کی جانے والی اس ویڈیو کو لائیو لیک پر اپ لوڈ کیا گیا جس کے بعد دنیا بھر کے ہزاروں لوگوں نے یہ ویڈیو دیکھ کر غم و غصے کے ساتھ کراہیت کا اظہار کیا ہے۔
ویڈیو میں دیکھا جا سکتا ہے کہ لال بیگ نشستوں کے اندر سے نکل رہے ہیں جبکہ ایئرلائن کی جانب سے فراہم کردہ تکیوں میں سے بھی نکل رہے ہیں۔
تیس سیکنڈ کی ویڈیو میں ناراض مسافر کو فضائی میزبان کو شکایت کرتے دیکھا اور سنا جا سکتا ہے۔ یہ واضح نہیں کہ آیا مسئلہ حل ہوا۔
بدقسمتی سے پی آئی اے میں پیش آنے والا یہ اس نوعیت کا پہلا واقعہ نہیں ہے۔ رواں سال فروری میں عمرہ کیلئے مدینہ جانے والے مسافروں کو کھڑے ہو کر سفر کرایا گیا تھا جبکہ 2013 میں پائلٹ نے برطانیہ سے پاکستان جانے والی پرواز میں شراب پی کر طیارہ اڑایا تھا۔
طیارے میں 156 افراد سوار تھے۔ پی آئی اے کے ترجمان نے برطانوی اخبار کو بتایا کہ متعلقہ حکام، پائلٹ اور کریو ممبران کیخلاف کارروائی شروع کی جا چکی ہے۔