عراقی کردستان میں آزادی کیلئے ریفرنڈم،ووٹنگ جاری

25 ستمبر ، 2017

عراق کی ریاست کردستان میں آزادی کے لیے ریفرنڈم آج ہورہا ہےجس کے لئے ووٹنگ جاری ہے ۔ واضح رہے کہ وزیراعظم حیدرالعبادی کی مرکزی حکومت اس ریفرنڈم کے خلاف ہے تاہم مخالفت کے باوجود ریاست کردستان میں ملک سے علیحدگی کے لیے ریفرنڈم کرایا جارہا ہے۔

حیدرالعبادی کا کہنا ہے کہ اگر کردستان کی حکومت و عوام نے علیحدگی کا فیصلہ کیا تو فوجی مداخلت بھی کی جاسکتی ہے ۔

ادھر ترکی اور ایران نے بھی آزادی کی مخالفت کی ہے اور خدشہ ظاہر کیا ہے کہ اس طرح علیحدگی کی تحریکیں زور پکڑ سکتی ہیں۔ ترک پارلیمنٹ میں پہلے ہی عراق میں فوجی مداخلت کا بل منظور ہوچکا ہے جبکہ ایران نے کردستان جانے والی پروازیں روک دی ہیں۔

مغربی ممالک نے ریفرنڈم پر تحفظات کا اظہار کرتے ہوئے عراق میں ایک اور محاذ آرائی شروع ہونے کا خدشہ ظاہر کیا ہے تاہم کرد عوام کی بڑی تعداد تمام تر اعتراضات کو مسترد کرتے ہوئے ووٹنگ میں حصہ لے رہی ہے ۔