تحریک انصاف کے ترجمان فواد چوہدری نے کہا ہے کہ وزیراعظم شاہدخاقان عباسی سپریم کورٹ پر ناراض ہونے کے بجائے نوازشریف کو اپنے کرتوت صحیح کرنے کا مشورہ دیں۔
ایک بیان میں فواد چوہدری نے کہا کہ 300 ارب کا جواب نہ ہونے پر عدلیہ کو تنقید کا نشانہ بنایا جارہا ہے ،نوازشریف نے ن لیگ کو منی لانڈرنگ کے لئے استعمال کیا ۔
ان کا کہناتھاکہ نوازشریف اداروں کو تنقید کا نشانہ بنارہے ہیں لیکن وہ 300 ارب سے متعلق جواب نہیں دے رہے،اب وقت آگیا ہے کہ سابق وزیراعظم حساب دیں یا اڈیالہ جیل جائیں۔
فواد چوہدری نے یہ بھی کہا کہ ن لیگ کی طرف سے زبیر گل نامی ایک شخص کو سینیٹ کا ٹکٹ دیا گیا ہے جس پر پاکستان میں مقدمہ درج ہے اور اس نے لندن میں پناہ لے رکھی ہے۔
انہوں نے مزید کہا کہ نوازشریف جس سے بھی ہاتھ ملاتے ہیں اس سے پیسوں کی بات کرتے ہیں، زبیر گل کی سربراہی میں لندن میں ن لیگ دفتر بنایا گیا ،جہاں سے اربوں روپے کی فنڈنگ بھیجی گئی جو الیکشن کو نہیں بتائی گئی ۔