شہید ASI اکبر سرکاری اعزاز کیساتھ سپردِ خاک

سادھوکی میں گزشتہ روز کالعدم تنظیم کے کارکنوں کی فائرنگ سے شہید ہونے والے اے ایس آئی اکبر علی کو سرکاری اعزاز کے ساتھ ان کے آبائی علاقے چونیاں میں سپردِ خاک کر دیا گیا۔

شہید اے ایس آئی محمد اکبر کی نمازِ جنازہ کمیٹی باغ چونیاں میں ادا کی گئی، نمازِ جنازہ میں پولیس افسران، سیاسی و سماجی شخصیات اور شہریوں کی بڑی تعداد نے شرکت کی۔

پولیس کے دستے نے شہید کی میت کو سلامی بھی پیش کی، جس کے بعد اے ایس آئی محمد اکبر کو مکمل سرکاری اعزاز کے ساتھ سپردِ خاک کیا گیا۔

کالعدم تنظیم سے جھڑپ، شہید ASI کی میت گھر منتقل

کالعدم تنظیم اور پولیس کے درمیان جھڑپوں کے دوران شہید ہونے والے اے ایس آئی محمد اکبراعوان کی میت ان کے قصور میں واقع آبائی گھر پہنچا دی گئی۔

ڈی پی او قصور عمران کشور کا کہنا ہے کہ شہید محمد اکبر ایک فرض شناس اور قابل افسر تھا، جس پر قصور پولیس کو ناز ہے۔

ڈی پی او قصور عمران کشور کا کہنا ہے کہ شہید اے ایس آئی محمد اکبر کی اہلیہ کچھ عرصہ قبل انتقال کر گئی تھیں، اس کی 7 سال کی ایک بیٹی ہے جس نے اپنے باپ کو بھی کھو دیا ہے، شہید اہلکاروں کے ورثاء کو تنہا نہیں چھوڑیں گے، ہر شہید کی فیملی ہماری اپنی فیملی ہے۔

ڈی پی او قصور کا یہ بھی کہنا ہے کہ یہ پہلا موقع نہیں ہے کہ پولیس کے جوان اپنی جانوں کا نذرانہ پیش کر رہے ہیں، اپنی جانوں کی قربانیاں دینے والوں کو خراجِ عقیدت پیش کرتے ہیں۔