• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

کیا بھارتی ہیلی کاپٹر کو فضا ہی میں آگ لگ چکی تھی؟

جنرل بپن راوت - فوٹو: فائل
جنرل بپن راوت - فوٹو: فائل

بھارتی چیف آف ڈیفنس اسٹاف (سی ڈی ایس) جنرل بپن راوت اور دیگر 13 افراد کی موت کی وجہ بننے والے ہیلی کاپٹر کے حادثے سے متعلق نئی ویڈیو سامنے آئی ہے۔

سماجی رابطے کی ویب سائٹ ٹوئٹر پر بھارتی فضائیہ ایم آئی 17 ہیلی کاپٹر کے تامل ناڈو کے علاقے کونور کے قریب حادثے کی نئی ویڈیو وائرل ہوچکی ہے۔

ٹوئٹر پر وائرل ویڈیوز کے حوالے سے صارفین کا دعویٰ ہے کہ یہ اُسی ہیلی کاپٹر کی ہے، جس میں جنرل بپن راوت و دیگر سوار تھے اور اسے فضا ہی میں آگ لگ گئی تھی۔

بھارتی فضائیہ اور میڈیا نے فی الحال حادثے کی وجوہات اور اس کے پیش آنے کے عمل سے متعلق کوئی بات جاری نہیں کی۔

بھارتی میڈیا فی الحال حادثے کی وجوہات جاننے سے متعلق سوالات اٹھارہا ہے اور ماہرین سے اس بارے میں رائے طلب کر رہا ہے۔

اب تک کی میڈیا رپورٹس میں یہ بات سامنے آئی ہے کہ ہیلی کاپٹر حادثے کی وجہ یا تو موسم کی خرابی ہوسکتی ہے یا پھر کوئی تکنیکی مسئلہ اسے درپیش آیا جس کی وجہ سے وہ گر گیا۔

بھارتی میڈیا نے اپنے ملک کے پہلے سی ڈی ایس جنرل بپن راوت کی موت کی تصدیق کی ہے، ہیلی کاپٹر میں اُن کی اہلیہ سمیت کل 9 مہمان اور عملے کے 4 افراد سوار تھے۔

بھارتی فضائیہ نے اپنے بیان میں جنرل بپن راوت کی حادثے میں المناک موت کی تصدیق کی ہے۔

بھارتی فضائیہ نے ایک بیان میں واضح کیا کہ ہیلی کاپٹر حادثے کی وجوہات جاننے کے لیے انکوائری کا آغاز کردیا گیا ہے۔

بین الاقوامی خبریں سے مزید