صوبے میں 4 ماہ سے دہشتگردی کا کوئی واقعہ نہیں ہوا،IG خیبر پختونخوا

27 دسمبر ، 2021

پشاور میں آئی جی پی خیبرپختونخوا معظم جاہ انصاری کا کہنا ہے کہ افغانستان میں بدلتی صورتحال کے بعد صوبے میں امن قائم رکھنا چیلنج تھا، ساڑھے 4 ماہ سے صوبے میں دہشتگردی کا کوئی واقعہ نہیں ہوا، جبکہ بلدیاتی انتخابات کے دوران ہوائی فائرنگ میں ملوث 87 افراد کے خلاف کارروائی کی گئی ہے۔

پشاور میں میڈیا سے گفتگو کر تے ہوئے آئی جی پی خیبرپختونخوا معظم جاہ انصاری نے کہاکہ منشیات کی روک تھام کےلئے پولیس نے بڑا کام شروع کردیا ہے، رواں سال 1200 کلوگرام ہیروئن پکڑی گئی ہے۔

آئی جی پی معظم جاہ انصاری نے بتایا کہ اسٹریٹ کرائم کو روکنے کےلئے اقدامات کئے گئے ہیں، اغواء برائے تاوان کے کیسز میں واضح کمی ہوئی ہے، شہریوں میں آج احساس تحفظ ہے، تھانہ کلچر تبدیل کرنا ہماری ترجیح ہے، خیبرپختونخوا سب سے زیادہ قربانیاں دینے والی پولیس ہے۔

معظم جاہ انصاری کاکہنا تھا کہ صوبے میں پولیو کی مہم چلائی گئی اور 1 کروڑ سے زیادہ بچوں کی قطرے پلائے گئے، ہم خواتین ہراسگی کیسز کی روک تھام کے لئے اقدامات کر رہے ہیں، خواتین ہراسگی کیسز سے متعلق ایپ تیار کرلی ہے، بچے اور خواجہ سرا بھی ایپ کے ذریعے پولیس کی مدد حاصل کرسکتے ہیں۔

انہوں نے کہا کہ پولیس جہاد سمجھ کر خواتین کو تحفظ دے گی، صوبے کے 34 میں سے 17 تھانوں کو آسان انصاف مراکز میں تبدیل کیا جائے گا، رواں سال 48 پولیس اہلکار شہید اور 46 ہزار اہلکار زخمی ہوئے ہیں،جبکہ رواں سال 1 لاکھ 11 ہزار ملزمان گرفتار اور 25 ہزارہتھیار برآمد کیے ہیں۔

آئی جی پی نے کہاکہ رواں سال سی ٹی ڈی نے 599 دہشتگردوں کو گرفتار کیا، دہشتگردوں سے خودکش جیکٹس سمیت دیگر اسلحہ برآمد کیا گیا۔

ان کا مزید کہنا تھا کہ آئندہ بلدیاتی انتخابات جہاں ہوں گے وہاں جنوری ،فروری میں برفباری اور سردی زیادہ ہوتی ہے، اپریل میں رمضان ہے، اس لئے آئندہ بلدیاتی انتخابات مارچ میں کروائے جائیں۔

تازہ ترین