عاصم اظہر نے کنسرٹ میں منچلوں پر برہم ہونے کی وجہ بتادی

04 جنوری ، 2022

پاکستان میوزک انڈسٹری کے نوجوان گلوکار عاصم اظہر کنسرٹ میں نوجوان لڑکوں پر برہم ہونے کی وجہ بتاتے ہوئے وضاحت دے دی۔

عاصم اظہر نے اپنی انسٹاگرام اسٹوری میں اپنے کنسرٹ کی وہ ویڈیو شیئر کی جس میں وہ منچلوں پر غصہ کرتے نظر آرہے ہیں۔

گلوکار نے ویڈیو شیئر کرتے ہوئے لکھا کہ ’میں عام طور پر اس طرح کی چیزیں شیئر نہیں کرتا ہوں لیکن جو بھی میرے کنسرٹ میں آیا ہے وہ جانتا ہے کہ میں یہ بالکل برداشت نہیں کرسکتا ہوں کہ میرے سامنے کسی خاتون یا فیملی کو ہراساں کیا جائے۔‘

اُنہوں نے کہا کہ ’میں جن لڑکوں پر برہم ہورہا تھا وہ کُھلے عام شراب پی رہے تھے اور ایک خاندان کو بہت تنگ کر رہے تھے۔‘

عاصم اظہر نے اپنے ناقدین کو جواب دیتے ہوئے کہا کہ ’وہ لوگ جو یہ سوچتے ہیں کہ یہ ایک اسٹنٹ تھا، وہ کچھ بھی سوچ سکتے ہیں لیکن میں اسٹیج پر ہمیشہ ایسے لوگوں کو تمیز دِلاتا رہوں گا جو میرے سامعین کو تنگ کریں گے۔‘

گلوکار نے مزید کہا کہ ’اسٹیج پر کھڑے ہوکر سب نظر آتا ہے اور مجھے کچھ زیادہ ہی نظر آتا ہے۔‘

واضح رہے کہ سالِ نو کے موقع پر دیگر گلوکاروں کی طرح عاصم اظہر نے بھی اپنے مداحوں کے لیے وفاقی دارالحکومت اسلام آباد میں کنسرٹ کیا تھا۔

سوشل میڈیا پر وائرل ہونے والی ویڈیو میں دیکھا جاسکتا ہے کہ کنسرٹ کے دوران نوجوان لڑکے وہاں موجود فیمیلیز کے ساتھ بدتمیزی کررہے ہوتے ہیں جنہیں عاصم اظہر دورانِ کنسرٹ ڈانٹتے ہیں۔

انٹرٹینمنٹ سے مزید