عمران خان خط کے معاملے پر بھی یوٹرن لے لیں گے، شیری رحمٰن

06 اپریل ، 2022

پیپلز پارٹی کی رہنما شیری رحمٰن کا کہنا ہے کہ خط کے معاملے پر بھی عمران خان جلد یو ٹرن لے لیں گے،یہ ’35 پنچر‘ کی طرح بعد میں کہے گے ان کا سیاسی بیان تھا۔

سماجی رابطے کی سائٹ ٹوئٹر پر سلسلہ وار پیغامات میں شیری رحمٰن نے کہا کہ جس خط پر عمران خان ایک خطرناک بیانیہ بنا رہے ہیں اس کی صداقت پر اب کئی سوالات اٹھ چکے ہیں، عمران خان اور اسپیکر کو اب سازش اور غداری کا الزام ثابت کرنا ہوگا۔

شیری رحمٰن نے کہا کہ آپ 197 ارکان اسمبلی پر خارجہ سازش میں ملوث ہونے کا الزام لگا کر سیاست تو کر سکتے ہیں لیکن سچ ثابت نہیں کر سکتے۔

پی پی رہنما کا کہنا تھا کہ عدم اعتماد سے بچنے کے لئے آئین کو پامال کیا گیا، وزیراعظم، اسپیکر اور ڈپٹی اسپیکر نے دنیا کے سامنے آئین کی خلاف ورزی کی۔

انہوں نے مزید کہا کہ آئین کی پاسداری کا حلف اٹھانے والوں نے آئین شکنی کی، فیصلے میں تاخیر کی وجہ سے غیر یقینی کی صورتحال میں مزید اضافہ ہو رہا ہے، آئین انصاف کا منتظر ہے۔

ان کا یہ بھی کہنا تھا کہ عمران خان آئین توڑ کر لوگوں کو احتجاج پر اکسا رہے ہیں، آئین توڑ کر یہ جمہوریت کے محافظ بننے کی کوشش کر رہے ہیں اور ہمیشہ کی طرح جھوٹ پر مبنی بیانیہ بنایا جا رہا ہے۔