ٹیکساس اسکول حملہ: فائرنگ سے ہلاک ٹیچر کا شوہر صدمے سے چل بسا

امریکی ریاست ٹیکساس کے اسکول میں فائرنگ کے نتیجے میں ہلاک ہونے والی خاتون ٹیچر کا شوہر صدمے سے چل بسا۔

بین الاقوامی میڈیا رپورٹس کے مطابق گزشتہ دنوں ٹیکساس اسکول میں طلبہ کو بچاتے ہوئے ایک خاتون ٹیچر فائرنگ سے ہلاک ہوگئی تھیں۔

اب گزشتہ روز ٹیچر کا شوہر اپنی اہلیہ کی اچانک موت کے صدمے سے دُنیا سے رخصت ہوگیا۔

رپورٹس میں کہا جارہا ہے کہ ٹیچر کے شوہر کی موت دل کا دورہ پڑنے کی وجہ سے ہوئی۔ 

روب ایلیمنٹری اسکول کی ویب سائٹ کے مطابق، جوڑے کی شادی 24 برس قبل ہوئی تھی اور اُن کے چار بچے تھے۔

ٹیکساس اسکول میں فائرنگ سے قبل حملہ آور نے اپنی دادی کوقتل کیا

امریکی ریاست ٹیکساس کے ایک اسکول میں 19 بچوں اور 2 اساتذہ کو قتل کرنے والے ملزم نے حملے سے قبل ہی سوشل میڈیا پر اپنے منصوبے کے بارے میں خبردار کردیا تھا۔

 خیال رہے کہ امریکی ریاست ٹیکساس کے اسکول میں فائرنگ کے نتیجے میں 19 کمسن بچے اور 2 ٹیچرز ہلاک ہوئے تھے۔

غیر ملکی میڈیا نے رپورٹ کیا تھا کہ ملزم کی فائرنگ سے دو سیکیورٹی اہلکاروں سمیت 14 افراد زخمی بھی ہوئے تھے۔

پولیس نے اسکول میں فائرنگ کرنے والے 18 سالہ نوجوان سیلواڈور راموس کو گولی مار کر ہلاک کردیا تھا۔