رانا ثناء کے ہوتے ن لیگ کو دشمن کی ضرورت نہیں، فرخ حبیب

پاکستان تحریک انصاف (پی ٹی آئی) کے رہنما فرخ حبیب کا کہنا ہے کہ  رانا ثناء اللّٰہ کے ہوتے ہوئے (ن) لیگ کو کسی دشمن کی ضرورت نہیں ہے، ن لیگ کے نئے تاحیات لیڈر آصف زرداری ہیں۔

اسلام آباد میں میڈیا سے گفتگو کرتے ہوئے فرخ حبیب نے کہا کہ 13 جماعتوں نے اتحاد کرکے 3 رکنی بینچ پر جو حملہ کیا اس کی مثال نہیں ملتی، گورنر راج لگانے کا شوق پورا کرنا ہے تو کرلیں، گورنر راج 2 گھنٹے بھی نہیں رہ سکتا۔

فرخ حبیب نے کہا کہ سپریم کورٹ کے فیصلے کو یوم تشکر کے طور پر منایا جائے گا، عمران خان آئندہ کے لائحہ عمل سے قوم کو آگاہ کریں گے، عوام کی بھلائی کے لیے منصوبوں کو دوبارہ شروع کیا جائے گا۔

پی ٹی آئی رہنما نے مزید کہا کہ ثانیہ نشتر کو عوام کی بھلائی کے منصوبوں کے لیے ذمہ داری سونپی جائے گی۔

فرخ حبیب نے کہا کہ ن لیگ آصف زرداری کے فیصلوں کی وجہ سے خوار ہوگئی ہے۔