آئندہ ہفتے کراچی میں گرمی بڑھنے کا امکان

01 اکتوبر ، 2022

کراچی میں آئندہ 5 سے 6 دن تک موسم معتدل رہنے کا امکان ہے جبکہ 6 یا 7 اکتوبر سے شہر میں گرمی بڑھنے کا امکان ہے۔

جیو نیوز سے بات کرتے ہوئے موسمیاتی تجزیہ کار نے کہا کہ بھارتی گجرات میں پوسٹ مون سون سسٹم سے سمندری ہوائیں متاثر ہونے کا امکان ہے، آج رات سے مغربی ہواؤں کا سسٹم ملک کے شمالی حصے پر اثر انداز ہو سکتا ہے۔

موسمیاتی تجزیہ کار کا کہنا ہے کہ مغربی ہواؤں کا معتدل سسٹم 48 سے 72 گھنٹوں تک اثر انداز رہ سکتا ہے، سسٹم کے تحت خیبرپختونخوا، گلگت بلتستان، بالائی پنجاب میں گرج چمک کے ساتھ بارش کا امکان ہے، اتوار تک سسٹم کی شدت رہنے کا امکان ہے۔

شمالی علاقوں اور پہاڑوں پر برفباری بھی ہوسکتی ہے، پنجاب، بلوچستان اور سندھ میں موسم گرم رہنے کا امکان ہے، اکتوبر میں 4 سے 5 مغربی ہواؤں کے سسٹم شمالی حصے پر اثر انداز ہو سکتے ہیں۔

موسمیاتی تجزیہ کار نے کہا کہ اکتوبر میں1 سے 2 مغربی ہواؤں کے سسٹم سندھ اور بلوچستان پر اثر انداز ہو سکتے ہیں، جنوب مشرقی سندھ اور ساحلی علاقوں میں بارش کے 1 سے 2 سسٹم آسکتے ہیں۔

قومی خبریں سے مزید