امریکا و پاکستان کو مشترکہ تعاون سے بڑی کامیابیاں ملیں، فاصلوں سے نقصان ہوا، وزیر خارجہ

15 دسمبر ، 2022

وزیر خارجہ بلاول بھٹو امریکی نشریاتی ادارے کی پاکستانی نژاد اینکر آمنہ نواز کو انٹرویو دے رہے ہیں۔

وزیر خارجہ بلاول بھٹو زرداری کا کہنا ہے کہ جب بھی امریکا اور پاکستان نے مل کر کام کیا، ہم نے بڑی کامیابیاں حاصل کیں اور جب پاکستان امریکا کے درمیان کوئی فاصلہ پیدا ہوا تو ہم نے اس سے نقصان اٹھایا۔

امریکی نشریاتی ادارے ”پبلک براڈکاسٹنگ سروس“ کو انٹرویو دیتے ہوئے بلاول بھٹو کا کہنا تھا کہ پاکستان اور امریکا کے دو طرفہ تعلقات مثبت سمت کی جانب بڑھ رہے ہیں۔

انہوں نے کہا کہ ماضی میں ہمارا تعاون دہشتگردی کے خلاف جنگ کے تناظر میں بہت تنگ اور مخصوص تھا لیکن اب دونوں ممالک وسیع البنیاد شراکت داری قائم کر رہے ہیں۔

انہوں نے کہا کہ امریکا کے ساتھ ہمارا 1950 کی دہائی سے تاریخی رشتہ ہے، پاکستان اور امریکا بہت سے شعبوں میں تعاون کر رہے ہیں، ہم ماحولیات اور صحت کے شعبوں میں مل کر کام کر رہے ہیں۔

ان کا کہنا تھا کہ چین ہمارا پڑوسی ملک ہے، اس کے ساتھ ہماری ایک طویل تاریخ ہے، پاکستان اور چین کے درمیان اقتصادی شعبہ سمیت دیگر شعبوں میں بہت تعاون ہے۔

وزیر خارجہ نے کہا کہ ہمیں انتہائی مشکل معاشی صورتحال، افراط زر اور ایندھن کی قیمتوں کا سامنا ہے۔

ان کا کہنا تھا کہ ہم کسی بھی رعایتی توانائی کا تعاقب نہیں کر رہے ہیں اور نہ ہی حاصل کر رہے ہیں، توانائی کے عدم تحفظ کے پیش نظر ہم مختلف راستے تلاش کر رہے ہیں۔

بلاول بھٹو زرداری نے کہا کہ عمران خان قبل از وقت انتخابات کی صورت میں کامیابی حاصل نہیں کرسکتے، اپنی نشستوں پر ضمنی انتخابات جیتنے کو ان کی مقبولیت کے جھوٹے ثبوت کے طور پیش کیا گیا۔

ان کا کہنا تھا کہ ہم نے عمران خان کو تحریک عدم اعتماد کے ذریعے ہٹایا، پہلا موقع ہے جب جمہوری آئینی طریقہ کار کے ذریعے کسی وزیراعظم کو پارلیمنٹ سے ہٹایا گیا۔

قومی خبریں سے مزید