سندھ ہائیکورٹ: بلدیاتی اداروں کے اختیارات سے متعلق درخواستوں پر حکم نامہ جاری

سندھ ہائیکورٹ میں بلدیاتی اداروں کے اختیارات سے متعلق درخواستوں پر سماعت کے دوران سیکریٹری بلدیات کی جانب سے جواب دائر نہ کرانے پر عدالت نے اظہار ناراضگی کیا۔

عدالت نے تحریری حکم نامہ جاری کرتے ہوئے سیکریٹری بلدیات اور ایڈیشنل سیکریٹری کو آئندہ سماعت پر پیش ہونے کی ہدایت دے دی۔

عدالتی حکم کے مطابق اٹارنی جنرل آف پاکستان اور ایڈووکیٹ جنرل سندھ بھی آئندہ سماعت پر اپنی پیشی یقینی بنائیں۔

سندھ ہائیکورٹ نے جواب دائر نہ کرانے کے متعلق ایڈیشنل سیکریٹری کی وجوہات غیر ضروری قرار دے دیں۔

عدالت نے تحریری حکم نامے میں آئندہ سماعت پر محکمہ بلدیات کو جواب جمع کرانے کا حکم دیا۔

عدالت نے کہا کہ اگر جواب جمع نہیں کرایا گیا تو عدالت مناسب حکم جاری کرے گی۔

عدالتی حکم کی کاپی اٹارنی جنرل، ایڈووکیٹ جنرل اور سیکریٹری بلدیات کو ارسال کرنے کی ہدایت دی گئی ہے۔

درخواست گزار کے وکلاء کا موقف ہے کہ بلدیاتی قانون کی ترامیم سپریم کورٹ کے حکم کے برعکس ہیں۔