گورنر سندھ کا پولیس ہیڈ کوارٹر کا دورہ، آئی جی سندھ کی بریفنگ

گورنر سندھ کامران ٹیسوری نے سینٹرل پولیس آفس کراچی کا دورہ کیا اور آئی جی سندھ غلام نبی میمن سے ملاقات کی۔ اس موقع پر گورنر سندھ کے ہمراہ ایڈمنسٹریٹر کراچی بھی موجود تھے۔

آئی جی سندھ نے اسٹریٹ کرائمز سے متعلق گورنر سندھ کو بریفنگ دی۔ بعد ازاں گورنر اور آئی جی سندھ نے کمانڈ اینڈ کنٹرول سینٹر کا بھی دورہ کیا۔

گورنر سندھ کو شہر بھر میں لگائے گئے کیمروں اور مانیٹرنگ سسٹم پر تفصیلی بریفنگ دی گئی۔ 

گورنر سندھ نے آئی جی کو ہدایات دیتے ہوئے اسٹریٹ کرائم کو کنٹرول کرنے کے لیے کہا، ان کا کہنا تھا کہ انٹیلی جنس کا نظام کمزور ہے، اسے مضبوط اور مربوط کیا جائے۔ 

ان کا مزید کہنا تھا کہ عوام نہیں بلکہ مجرم کو پولیس کا ڈر ہونا چاہیے، شہر میں مجرم کھلا پھرتا ہے اور عوام ڈرتی ہے۔

گورنر سندھ کا کہنا تھا کہ پولیس کی امیج کو بہتر بنانا ہوگا۔