ناصر بٹ نے ٹی وی چینل کیخلاف ہتک عزت کا مقدمہ جیت لیا

مسلم لیگ ن کے رہنما ناصر بٹ نے نجی ٹی وی چینل کے خلاف ہتک عزت کا مقدمہ جیت لیا۔

برطانوی ہائی کورٹ کے جج ماسٹر ڈیگنل نے چینل کو مقدمے کے اخراجات ادا کرنے کا بھی حکم دے دیا۔

 ناصر بٹ نے چینل کے خلاف ایک لاکھ پاؤنڈ کا ہتک عزت کا مقدمہ جیتا ہے، ٹی وی چینل نے اپنے دو پروگراموں میں ان پر سنگین الزامات لگائے تھے۔

ہائی کورٹ کے جج نے ریمارکس دیتے ہوئے کہا کہ مسلم لیگی رہنما ناصر بٹ کے خلاف مہم سیاسی مخاصمت پر چلائی گئی، ان کو نواز شریف سے قربت اور ارشد ملک کی ویڈیو بنانے پر پی ٹی آئی حکومت، چند اینکرز نے نشانے پر رکھا۔

ناصر بٹ کا تسنیم حیدر کے خلاف ہتک عزت کا مقدمہ کرنے کا اعلان

لندن میں پریس کانفرنس کرتے ہوئے ناصر بٹ نے کہا کہ حلفاً کہتا ہوں کہ تسنیم حیدر کا مسلم لیگ سے کوئی تعلق نہیں، تسنیم حیدر کے خلاف پولیس سے رجوع کروں گا۔

برطانوی عدالت کے جج نے چینل کو نواز شریف اور ناصر بٹ کے خلاف برطانیہ میں بےبنیاد الزامات لگانے سے روک دیا۔

جج کا یہ بھی کہنا ہے کہ خاندان پر حملے اور الزامات کے باعث ناصر بٹ مناسب ہرجانے کا مستحق ہے۔

ناصر بٹ کا کہنا ہے کہ جھوٹے الزامات لگانے والے بےنقاب ہوئے، یقین تھا فتح سچ کی ہو گی، برطانوی عدالت کا فیصلہ نواز شریف کی بے گناہی کا نیا ثبوت ہے۔