اردو بولنے پر طالبعلم کے منہ پر کالک لگانے والا استاد فارغ

30 جنوری ، 2023

کراچی کے نجی اسکول میں اردو بولنے پر طالبعلم کے منہ پر کالا رنگ لگانے والے استاد کو اسکول سے فارغ کر دیا۔

چیئرمین آل پرائیوٹ اسکولز مینجمنٹ ایسوسی ایشن سندھ طارق شاہ کا کہنا ہے کہ بچے کو اردو بولنے پر ہراساں کرنے کی شدید الفاظ میں مذمت کرتے ہیں۔

انہوں نے کہا کہ نجی اسکول سے معلوم ہوا کہ اسکول ٹیچر نے بچے کے ساتھ یہ حرکت کی، ٹیچر کو اسکول انتظامیہ نے شوکاز دیا، آج اسکول انتظامیہ نے اس کو اسکول سے فارغ کر دیا ہے۔

طارق شاہ کا کہنا ہے کہ ٹیچر کی اس حرکت پر تمام والدین سے معذرت کرتے ہیں، اسکولوں میں طالبعلموں کو ہراساں کرنے پر آواز اٹھاتے رہیں گے۔

واضح رہے کہ کچھ روز قبل کراچی کے علاقے نارتھ ناظم آباد کے نجی اسکول میں طالبعلم کی جانب سے اردو بولنے پر استاد نے شاگرد کے منہ پر کالک مل دی تھی، جس کی ویڈیو سوشل میڈیا پر وائرل ہوئی تھی۔

قومی خبریں سے مزید