فرمان الہی
نماز کے اوقات
پاکستان کے سابق ٹیسٹ کرکٹر سلیم یوسف نے کہا ہے کہ بھارت کا پاکستان آنے سے صاف انکار سخت فیصلہ ہے اگر بھارتی ٹیم اپنے فیصلے پر برقرار رہتی ہے تو پھر پاکستان کو بھی بھارت نہیں جانا چاہیے۔
کراچی میں جیو نیوز سے گفتگو کرتے ہوئے سلیم یوسف نے کہا کہ کرکٹ میں یکطرفہ فیصلے نہیں کیے جاتے، پاکستان کوئی معمولی ٹیم نہیں ہے اس کا شمار دنیا کی ٹاپ ٹیموں میں ہوتا ہے۔
انہوں نے کہا کہ شائقینِ کرکٹ پاک بھارت میچز دیکھنا چاہتے ہیں، اگر بھارت یہ سمجھتا ہے کہ وہ بڑی ٹیم ہے اور وہ پاکستان نہیں جائے گی تو پھر پاکستان کو بھی بھارت نہیں جانا چاہیے کیونکہ پاکستان میں دنیا کی تمام بڑی ٹیمیں آچکی ہیں۔
سلیم یوسف نے کہا کہ آسٹریلیا، انگلینڈ اور نیوزی لیند سب ہی ٹیموں نے پاکستان آکر سیریز کھیلی، بھارت کو بھی پاکستان آکر ایشیا کپ کھیلنا چاہیے، شائقینِ کرکٹ دونوں ممالک کو ایک ساتھ کھیلتا دیکھنا چاہتے ہیں۔
سابق ٹیسٹ کرکٹر نے ایک سوال پر کہا کہ شاہین شاہ نوجوان بولر ہیں جو ابھی انجری سے واپس آیا ہے اس پر کپتانی یا نائب کپتانی کا بوجھ ڈالنا مناسب نہیں ہوگا۔
سلیم یوسف نے کہا کہ بابر اعظم بہترین کپتان ہیں انہیں کپتان برقرار رہنا چاہیے سمجھ نہیں آتا ہے کہ کپتان کی تبدیلی کی بات کہاں سے آرہی ہے۔
انہوں نے کہا کہ پاکستان ٹیم کا نائب کپتان شاداب ہو یا شاہین شاہ آفریدی کوئی زیادہ فرق نہیں پڑتا البتہ ٹیم کا کپتان صرف بابر اعظم کو ہی رہنا چاہیے۔
