سندھ ہائیکورٹ کا ایم پی او کے تحت نظر بند پی ٹی آئی کارکنان کو رہا کرنے کا حکم

سندھ ہائی کورٹ نے ایم پی او کے تحت پی ٹی آئی کے کارکنوں کی گرفتاری کے خلاف درخواستوں کی سماعت کرتے ہوئے ایم پی او کے تحت نظر بند شہریوں اور پی ٹی آئی کارکنان کو رہا کرنے کا حکم دے دیا۔

چیف جسٹس سندھ ہائی کورٹ احمد علی ایم شیخ نے کیس کی سماعت کی۔

دورانِ سماعت محکمۂ داخلہ سندھ اور پولیس حکام سندھ ہائی کورٹ میں پیش ہوئے۔

ایڈیشنل ایڈووکیٹ جنرل نے کہا کہ درخواست کے قابلِ سماعت ہونے کا مسئلہ ہے۔

کراچی: شاہ فیصل کالونی میں 200 پی ٹی آئی کارکنوں، 14 رہنماؤں پر مقدمہ

کراچی کے علاقے شاہ فیصل کالونی میں بھی پاکستان تحریکِ انصاف (پی ٹی آئی) کے رہنماؤں اور کارکنوں کے خلاف مقدمات درج کر لیے گئے۔

عدالت نے حاجی محمد کو ایم پی او کے تحت نظر بند کرنے کا نوٹیفکیشن معطل کر دیا۔

چیف جسٹس سندھ ہائی کورٹ نے ریمارکس دیے کہ یہ ایک شہری کی آزادی کا مسئلہ ہے، نظر بند کیے جانے والوں کے خلاف کیا مواد ہے؟

ایڈیشنل ایڈووکیٹ جنرل نے کہا کہ ہمیں موقع دیا جائے کہ ہم درخواست گزاروں کے خلاف مواد پیش کر دیں گے۔

عدالت نے 40 سے زائد پی ٹی آئی کارکنان اور شہریوں کو رہا کرنے کا حکم دیا۔

پی ٹی آئی کے کارکنان اور شہریوں کی رہائی سے متعلق تقریباً 50 درخواستیں زیرِ سماعت ہیں۔