خانیوال کے رہائشی کی پیدل سفر کرکے عمرے کی ادائیگی کے بعد وطن واپسی

خانیوال کا رہائشی پیدل سفر کرکے عمرے کی ادائیگی کے بعد سعودی عرب سےکوئٹہ پہنچ گیا۔

فیض اللّٰہ نامی خانیوال کا رہائشی ابوظہبی، دبئی، شارجہ اور ایران سے ہوتا ہوا کوئٹہ پہنچا ہے۔

فیض اللّٰہ11 ماہ 22 دن قبل عمرے کی ادائیگی کے لیےخانیوال کے علاقے کبیروالا سے روانہ ہوا تھا۔

اس نے خانیوال سے ایران تک پیدل سفر کیا اور پھر ایران سے بذریعہ بحری جہاز شارجہ پہنچا۔

اس کے بعد شارجہ، دبئی اور ابوظہبی کے راستے پیدل سفر کرکے سعودی عرب پہنچا تھا۔

فیض اللّٰہ کا اس سفر کے بارے میں کہنا ہے کہ دل میں خواہش تھی کہ پیدل سفر کرکے عمرے کے لیے سعودی عرب پہنچوں۔

اس نے بتایا کہ پیدل سفر کے دوران پاکستانی سفارتخانوں نے بہت تعاون کیا اور اب انشاء اللّٰہ آئندہ 20 روز میں پیدل سفر کرکے واپس کبیروالا پہنچ جاؤں گا۔