فرمان الہی
نماز کے اوقات
پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے کہ امپائر مداخلت نہ کرے تو پیپلز پارٹی جیت جاتی ہے، ہمارا مخالف کوئی فرد نہیں، بلکہ غربت اور مہنگائی ہے۔
لیاری کے ککری گراؤنڈ میں تقریب سے خطاب کرتے ہوئے بلاول بھٹو نے کہا کہ آج اس گراؤنڈ میں آئے ہیں جہاں آصف زرداری اور بےنظیر بھٹو کی شادی ہوئی تھی، لیاری سے تین نسلوں کا رشتہ ہے، آپ نے اسی ککری گراؤنڈ سے ضیاءالحق اور پرویز مشرف کو للکارا۔
پی پی چیئرمین نے کہا کہ سندھ میں بلدیاتی الیکشن میں جیالے سوئپ کرچکے ہیں، جب امپائر کی مداخلت نہیں ہوتی، لیول پلینگ فیلڈ کی گارنٹی ہوتی ہے تو جیالے جیت جاتے ہیں۔
بلاول بھٹو نے کہا کہ ہماری ہر نسل نے آپ کی خدمت کی ہے اب خدمت کرنے کی میری باری ہے، پیپلز پارٹی کیلئے اچھے دن شروع ہونے والے ہیں، ہمیں جب موقع ملا ہم نے عوام کی خدمت کی ہے، ہم نوجوانوں کو موقع فراہم کریں گے۔
انہوں نے کہا کہ کچھ ایسے سیاستدان ہیں جو نفرت اور تقسیم کی سیاست کرتے ہیں، پیپلز پارٹی نفرت اور تقسیم کی سیاست پر یقین نہیں رکھتی، اگر مسائل کا حل نکالنا ہے تو سب کو مل کر ان مسائل کا حل نکالنا ہے۔
بلاول بھٹو نے یہ بھی کہا کہ 2018 کے انتخابات میں آپ کے ووٹ پر ڈاکہ ڈالا گیا، اس ڈاکے کا انتقام جمہوری طریقے سے لیا، مسلط کیے گئے شخص کو عدم اعتماد کے ذریعے ہٹایا گیا۔
انہوں نے مزید کہا کہ آپ کے خلاف بہت سی سازشیں ہوئیں، ہم نے مشکل وقت دیکھا ہے، آگے جا کر پیپلز پارٹی کیلئے اچھا وقت شروع ہونے والا ہے، میری آپ سے درخواست ہے پیپلز پارٹی کا ساتھ دیں، ہم مل کر شہر اور صوبے کی خدمت کریں گے، ہم نوجوانوں کو موقع فراہم کریں گے جو ان کا حق ہے۔
