امامِ عالی مقام، سیدنا حسین ؓ

میگزینز

اسپیشل ایڈیشن

29 جولائی ، 2023

سیّد امیر احمد

یہ ایک ابدی ہے کہ انسانی تاریخ واقعات اور سانحات سے بھری ہوئی ہے،جو وقت گزرنے کے ساتھ ساتھ یادوں سے محو ہوتے چلے جاتے ہیں۔ تاہم یہ ناقابل تردید حقیقت ہے کہ واقعۂ کربلا کو گزرے ہوئے چودہ صدیاں گزر گئیں، مگر آج بھی غم حسین زندہ ہے، پوری دنیا کے مسلما ن 10 محرم کے واقعے پر دل گرفتہ ہیں۔ امام عالی مقام ؓ کی عظیم قربانی قیامت تک انسانیت کی رہنمائی کرتی رہے گی۔

آپ نے بچپن سے شہادت تک علم کے جوہر دکھائے، عالم انسانیت کے روشن چراغ، جرأت و شجاعت کے بے مثال کردار،نواسۂ رسولؐ حضرت امام حسین ؓ نے کربلا میں باطل نظریے پر کاری ضرب لگا کر دشمنوں کو ہمیشہ کےلیے نیست ونابود کر دیا۔ آپ کی قربانی نامساعد حالات کے باوجود حق کے لیے باطل قوتوں کے خلاف ڈٹ جانے کا درس دیتی ہے۔ آپ نے کربلا کے میدان میں اپنے اصحاب کے ساتھ رہنما اصول پیش کر کے حق وباطل میں ایک لکیر کھینچ دی۔ آپ نے اپنے اہل بیت واصحاب کی قربانی پیش کر کے اسلام کو زندہ کر دیا۔

یزید احکام الٰہی اور نبی کریمﷺ کی سنت اور دین الٰہی کے اصولوں سے انحراف کر رہا تھا تو ایسے میں نواسۂ رسولﷺ نے دین کے فروغ کے لیے اپنی اور اہل خانہ کی قربانی دے کر دین اسلام کو سرخرو کیا۔ شہید کربلا حضرت امام حسینؓ اور سپاہ یزید کی جنگ تلواروں کی نہیں، بلکہ اصولوں کی جنگ تھی ،کیونکہ آپ جانتے تھے کہ یزید نے جو اسلام کے نام پر اقتدار کا ڈھانچہ کھڑا کیا ہے، وہ غیراسلامی اور غیرشرعی ہے، اس میں حرام وحلال کی حدود مٹا دی گئی ہیں، اس کا اصرار تھا کہ کسی طرح سے حسینؓ سے بیعت لے لی جائے۔

آپ کو یہ کیسے گوارا تھا کہ آپ یزید کی بیعت کریں، چناںچہ آپ مدینہ منورہ سے مکہ معظمہ روانہ ہوئے اور وہاں سے عا زم کربلا ہوئے۔ ایک مقام آیا آپ نے دریافت کیا کہ اس جگہ کو کیا کہتے ہیں، بتایا گیا کہ اس جگہ کو ’’کربلا‘‘ کہتے ہیں۔ آپ نے آبدیدہ ہو کر کہاکہ یہی جگہ ہماری قتل گاہ ہے، چناںچہ وہیں خیمے نصب کر دیئے گئے،مگر جب یزید کو خیمے نصب کرنے کی اطلاع ملی تو اس نے حکم دیا کہ آپ کے خیمے وہاں سے ہٹا دیئے جائیں۔ اس پر انصار جوش میں آگئے اور حضرت عباس علمدار نے کہا کہ کس کی مجال ہے کہ میرے ہوتے ہوئے خیام حسینی کو یہاں سے ہٹایا جائے، لیکن امام عالی مقامؓ نے سب کو سمجھا بجھا کر وہاں سے خیمے ہٹالئے اور دریائے فرات سے تین میل کے فاصلے پر میدان میں خیمے نصب کئے ،جہاں پانی کا دور دور تک نام ونشان نہ تھا،آپ کا طرز عمل یہ بتاتاہے کہ آپ کا مقصد جنگ وجدل نہیں تھا ،بلکہ اپنے نانا کے دین کی حفاظت کرنا تھا۔

ساتویںمحرم کو آپ اور آپ کے جاں نثاروں پر پانی بند کر دیا جاتا ہے۔ عمرابن حجاج کو پانچ سو سواروں سمیت نہر فرات پر مقرر کر دیاگیا کہ خیام حسینی تک پانی نہ پہنچنے پائے۔ معصوم بچے پیاس سے بلک رہے ہیں ،ایسے میں جناب عباس سے بچوں کی تشنہ لبی نہیں دیکھی جاتی۔ آپ امام حسینؓ سے پانی لانے کی اجازت مانگتے ہیں، آپ اجازت نہیں دیتے۔ جناب عباس بار بار اصرار کرتے ہیں، بالآخر آپ صرف پانی لانے کی اجازت دیتے ہیں اور کہتے ہیں کہ عباس، جنگ میں پہل مت کرنا صرف پانی لانے کی سبیل کرنا۔

عباس نہر فرات پر پہنچتے ہیں ۔ علیؓ کے شیر کی وہ ہیبت ہے کہ فوج اشقیاء دور دور بھاگ جاتی ہیں ۔ مشکیزے کو دریا میں ڈالا اور اور پانی کو چلو میں بھر کر پھینک کر ساری دنیا کو بتا دیا کہ پانی ہمارے قبضے میں ہے۔ آپ کمال وفاداری کی وجہ سے نہر فرات میں داخل ہو کر پیاسے لوٹے اور وفاداری کے اعلیٰ ترین درجے پر فائز ہوئے۔ مشکیزہ بھر کر آپ واپس لوٹتے ہیں تو بکھری ہوئی فوجیں واپس آتی ہیں ،حکم ملتا ہے خبردار، خیام حسینی میں پانی نہ پہنچنے پائے،کہیں سے تیر آتا ہے اور کہیں سے پتھر آتا ہے، ایک تیر مشکیزے کو لگا اور سارا پانی بہہ گیا اور آپ شہادت کے درجے پر فائز ہوئے۔

شب عاشور امام عالی مقامؓ اور آپ کے انصار نے عبادت میں گزاری، دسویں کی صبح ہوتی ہے۔ آپ نے فوج اشقیا ءکو مخاطب کرتے ہوئے کہاکہ تم جانتے ہو کہ میں نبی کریمﷺ کا نواسہ ہوں۔ علیؓ کا بیٹا ہوں۔ ہمارے بارے میں رسول اللہ ﷺ نے فرمایا: حسن ؓوحسینؓ جوانان جنت کے سردار ہیں۔ تم لوگ کیوں میری جان لینے پر آمادہ ہو؟ افسوس کہ آپ کی اس تقریر کا بھی فوج اشقیاءپر کوئی اثر نہیں ہوا۔

بالآ خر جنگ کاآغاز ہوتا ہے، پہلے حسینؓ کے دوست حبیب ابن مظاہر، جناب زہیر، نافع ابن ہلال، مسلم ابن عوسجہ، عابس شاکری، بریر ہمدانی جاتے ہیں اور داد شجاعت دکھاتے ہوئے شہید ہوتے ہیں۔ اب اقربا کی باری آتی ہے، قاسم وعون محمد گئے ،اتنی بے جگر ی سے لڑے کہ دشمن کی فوج میں ہلچل مچ گئی۔ جعفر بن عقیل نے 15 دشمنوں کو واصل جہنم کیا اور شہادت کے درجے پر فائز ہوئے۔ محمد بن عبداللہ جعفر میدان میں آئے اور شہید ہوئے یہاں تک کہ ایک وقت ایسا آیا کہ جب آپ کے لخت جگر نور نظر حضرت علی اکبرؓنے اذن جہاد کی اجازت چاہی۔ علی اکبر آگے بڑھے اور نہایت دلیری سے لڑتے ہوئے شہید ہوئے۔

اس کے بعد آپ اپنے چھ ماہ کے شیرخوار علی اصغر کو میدان میں لے کر آئے اور کہاکہ اے فوج اشقیاء، اسے تھوڑا سا پانی پلا دو،جواب میں ایک تیر آیا اور بچے نے باپ کے ہاتھوں پر دم توڑدیا۔ ایک وقت ایسا آیا کہ آپ تنہا رہ گئے اور فوج یزید نے آپ کو چاروں طرف سے گھیر لیا، آپ نے تلوار کھینچ کر دشمن پر حملہ کیا تین دن کے بھوکے پیاسے نے میدان کربلا میں جرأت اور جواں مردی کی ایسی مثال قائم کی جس پر تاریخ انسانیت آج بھی ناز کرتی نظر آتی ہے۔

تاریخ میں ہے درج شجاعت حسینؓ کی

پہچان لی ہے جس نے بھی عظمت حسینؓ کی

نکلے گی اُس کے دل سے نہ اُلفت حسینؓ کی

دل میں ہر اِک نفس رکھو اُلفت حسینؓ کی

انساں کو بخشتی ہے یہ جرأت حسینؓ کی

حق اب بھی سرفراز ہے باطل کے سامنے

یہ فیض ہے حسینؓ کا ، برکت حسینؓ کی

بعد از غمِ حسینؓ کوئی غم نہیں رہا

حاصل ہوئی ہے ایسے نسبت حسینؓ کی

برباد ہو کے رہ گئے باطل پرست سب

باطل پہ اِس طرح پڑی ضربت حسینؓ کی

دنیا میں سر اُٹھائے گی جب بھی یزیدیت