چیئر لفٹ میں پھنسے افراد کو بچانے کیلئے دوسری کیبل لگانے کا کام شروع

چیئر لفٹ میں پھنسے افراد کو بچانے کے لیے دوسری کیبل لگانے کا کام شروع کردیا گیا۔

عینی شاہد نور الہادی کا بتانا ہے کہ دوسری کیبل لگانے کا کام شروع کردیا گیا ہے، دوسری کیبل لگا کر چھوٹی ڈولی میں ان افراد کو ریسکیو کیا جائے گا۔

نور الہادی نے کہا ہے کہ دوسری ڈولی لفٹ کی تنصیب میں دو سے تین گھنٹے لگ سکتے ہیں۔

سلنگ آپریشن جتنا جلدی شروع ہو بہتر ہے، ونگ کمانڈر ریٹائرڈ عاصم نواز

ونگ کمانڈر ریٹائرڈ عاصم نواز نے کہا ہے کہ سلنگ آپریشن جتنا جلدی شروع ہو بہتر ہے کیونکہ اس علاقے میں موسم خراب ہونے کا امکان رہتا ہے۔

نور الہادی کے مطابق پہلے ایک بچہ بے ہوش تھا لیکن اب دو بچے بے ہوش ہوچکے ہیں۔

انہوں نے کہا کہ اس سے قبل چھوٹے موٹے واقعات پیش آئے تاہم اس قسم کا واقعہ پیش نہیں آیا۔

واضح رہے کہ بٹگرام کی تحصیل الائی میں پہاڑوں کے درمیان چیئر لفٹ پھنس گئی تھی جس میں بچے بھی موجود ہیں۔