نوشکی واقعہ: شاہراہوں کے سیکیورٹی پلان پر نظرِ ثانی کریں گے، وزیر اعلیٰ بلوچستان

وزیر اعلیٰ بلوچستان سرفراز بگٹی کا کہنا ہے کہ نوشکی واقعے کے بعد شاہراہوں کے سیکیورٹی پلان پر نظرِ ثانی کریں گے، اپنا سیکیورٹی پلان دوبارہ تشکیل دیں گے۔

کوئٹہ میں میڈیا سے گفتگو کرتے ہوئے وزیر اعلیٰ بلوچستان  نے کہا کہ نوشکی میں معصوم پاکستانیوں کا خون بہایا گیا، دہشتگردوں کی کوئی قوم یا مذہب نہیں ہوتا، معصوم پاکستانیوں کا خون معاف نہیں کیا جائے گا۔

سرفراز بگٹی نے کہا کہ ہم لوگوں سے ڈائیلاگ کرنے پر یقین رکھتے ہیں، کسی کو گھناؤنی حرکتیں جاری رکھنے کی اجازت نہیں دیں گے، ریاست کی رٹ چیلنج کرنے کی اجازت نہیں دی جائے گی، ہم اپنا سیکیورٹی پلان دوبارہ سے تشکیل دیں گے۔

نوشکی واقعہ، بس میں سوار مسافر نے آنکھوں دیکھا حال سنادیا

بلوچستان کے ضلع نوشکی واقعے کی بس میں سوار دیگر افراد سٹی تھانہ نوشکی میں موجود ہیں۔

وزیر اعلیٰ بلوچستان نے مزید کہا کہ دہشت گردوں کو صرف دہشت گرد ہی پکارا جائے، ہم دہشت گردوں کے پیچھے جائیں گے، قوم پرستی کے نام پر دہشت گردی کی جا رہی ہے، جب تک ایک دہشت گرد بھی باقی رہے گا ہم لڑیں گے۔

انہوں نے کہا کہ بلوچستان کے لوگ اب متحمل نہیں ہو سکتے کہ آپ روز جلسے جلوس پر جائیں، الیکشن نتائج پر اعتراض ہے تو اس کے لیے فورم موجود ہے، جو جماعتیں بھی پر امن احتجاج کرتی رہیں گی تو ہماری سر آنکھوں پر ہیں۔